ខេត្តប៉ៃលិន ៖ បន្ទាប់ពីរដ្ឋាភិបាលប្រទេសថៃ មានបញ្ហាចម្រូងចម្រាស់ជាមួយនឹងរាជរដ្ឋាភិបាលកម្ពុជា រហូតឈានដល់បិទច្រកទ្វារព្រំដែនគ្រប់ទីកន្លែង ជាឯកតោភាគីរួចមក ធ្វើឱ្យពលករជាច្រើននាក់បង្ខំចិត្តវិលត្រឡប់មកស្រុកកំណើតវិញទាំងមានភាពតក់ក្រហល់ ខណៈពេលដែលពួកគេកំពុងតែនាំគ្នាធ្វើដំណើរឆ្លងដែនចេញមកពីប្រទេសថៃជាបន្តបន្ទាប់ ស្រាប់តែមានបុរសម្នាក់ឈឺចុកក្នុងពោះយ៉ាងខ្លាំង ទ្រាំស្ទើរមិនបានដោយសាររលាកខ្នែងពោះវៀន។
រីឯស្រ្តីវ័យក្មេងម្នាក់ទៀតក៏ឈឺចុកពោះខ្លាំង ដោយសារតែដល់ថ្ងៃគ្រប់ខែ ត្រូវសម្រាលកូនលើកទី២។
គ្រាន់តែទទួលបានដំណឹងនេះភ្លាម លោកជំទាវ បាន ស្រីមុំ អភិបាលខេត្តប៉ៃលិន បានចាត់ឱ្យក្រុមគ្រូពេទ្យប្រញាប់យករថយន្តសង្គ្រោះនៃមណ្ឌ លសុខភាពផ្សារព្រំ ដឹកយកទៅសង្គ្រោះ ធ្វើការវះកាត់ និងជួយសម្ភពនៅមន្ទីរពេទ្យបង្អែកខេត្តទាន់ពេលវេលា។
ហេតុការណ៍នេះ បានកើតឡើងនាព្រឹកថ្ងៃទី 25 ខែមិថុនា ឆ្នាំ2025 ស្ថិតព្រំដែនកម្ពុជាថៃ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ប្រភពព័ត៌មានពីមន្រ្តីសាលាខេត្តប៉ៃលិន បានឱ្យដឹងថា ស្រ្តីពលករមានផ្ទៃពោះគ្រប់ខែឈឺសម្រាលកូនទី២ មាន ឈ្មោះ និត ស្រីនាង អាយុ19ឆ្នាំ មានស្រុកកំណើតនៅក្នុងភូមិអង្រ្គង ឃុំជ្រី ស្រុកមោងឬស្សី ខេត្តបាត់ដំបង ដោយមានអាការ:ឈឺពោះសំរាលកូន (ផ្ទៃពោះកូនទី2 ធ្លាប់វះកាត់ពេលសម្រាលកូនទី១ម្តងរួចហើយ)។
ចំណែកឯអ្នកជម្ងឺម្នាក់ទៀតឈ្មោះ សេន មករា ភេទប្រុស អាយុ២៤ឆ្នាំ មានស្រុកកំណើតនៅភូមិសារិកាកែវ ឃុំជើងរស់ ស្រុកមុន្នីជ័យ ខេត្តកំពង់ស្ពឺ ដោយបានទទួលការវះកាត់រលាកខ្នែងពោះវៀនរួចរាល់។
បើតាមប្រភពព័ត៌មានពីម្តាយស្រ្តីមានផ្ទៃពោះសម្រាលកូនទី២ខាងលើ បានរៀបរាប់ឱ្យដឹងថា ៖ កូនស្រីរបស់គាត់ បានធ្វើដំណើរតាមប្តីទៅធ្វើការនៅប្រទេសថៃអស់រយៈពេលជាង២ឆ្នាំមកហើយ ពោលគឺចេញទៅទាំងគ្រួសារ តាំងពីកំណើតកូនទី១រួចមកម្លេះ ដោយបានធ្វើលិខិតឆ្លងដែនទៅស្នាក់នៅស៊ីឈ្នួលធ្វើការឱ្យថៅកែថៃម្នាក់។
ក្រោយមកកូនស្រីរបស់គាត់ ក៏មានផ្ទៃពោះកូនទី២បន្តទៀត ដោយចង់ធ្វើដំណើរមកសម្រាលកូននៅប្រទេសខ្មែរឱ្យបានទាន់ពេលវេលាដែរ តែដោយសារនាង និងប្តីរវល់ធ្វើការងារពីមួយថ្ងៃទៅមួយថ្ងៃជាប់ជានិច្ច គ្មានថ្ងៃឈប់សម្រាក ហើយក៏ភ្លេចគិតពីថ្ងៃត្រូវសម្រាលកូន ដោយពន្យារពេលរហូតទាល់តែគ្រប់ខែ និងឈឺពោះសម្រាលបែបនេះតែម្តង។
ប្រភពបន្តទៀតថា ខណៈពេលកំពុងធ្វើដំណើរឆ្លងដែនចូលមកក្នុងប្រទេសខ្មែរវិញ ស្រាប់តែកូនរបស់គាត់ចាប់ផ្តើមឈឺចុកពោះខ្លាំងឡើងៗ ដោយដើរឆ្លងដែនស្ទើរមិនកើត ហើយត្រូវបានក្រុមការងារប្រចាំការនៅច្រកទ្វារអន្តរជាតិព្រំ ជួយទាន់ពេល។
ស្រ្តីជាម្តាយបន្តទៀតថា ពួកគាត់ជាពលករ ដែលកំពុងជួបបញ្ហាទាំងនេះ ពិតជារំភើបក្នុងចិត្តយ៉ាងខ្លាំង ដែលទទួលបានការយកចិត្តទុកដាក់ពីសំណាក់ថ្នាក់ដឹកនាំខេត្តប៉ៃលិន ជាពិសេស គឺលោកជំទាវ បាន ស្រីមុំ ដែលបានចាត់ឱ្យក្រុមការងាររង់ចាំទទួលស្វាគមន៍ពួកគាត់ ដោយមានភាពកក់ក្តៅ ហើយថែមទាំងជួយសង្គ្រោះពួកគាត់ដែលមានបញ្ហាជំងឺទាន់ពេលវេលា។
ពាក់ព័ន្ធទៅនឹងបញ្ហានេះ ក្រោយពេលធ្វើការវះកាត់អ្នកជំងឺរលាកខ្នែងពោះវៀន និងស្រ្តីសម្រាលកូនរួច ក៏បន្តសម្រាកនៅក្នុងមន្ទីរពេទ្យបង្អែកខេត្តប៉ៃលិន រហូតដល់ជាសះស្បើយ ទើបអនុញ្ញាតឱ្យត្រឡប់ទៅស្រុកកំណើតរៀងៗខ្លួន៕ ដោយ សេន ត
