ខេត្តសៀមរាប ៖ សង្កាត់រដ្ឋបាលជលផលសូទ្រនិគម បានសហការជាមួយគណៈបញ្ជាការឯកភាពរដ្ឋបាលស្រុក (នាយករងរដ្ឋបាលស្រុកមូលដ្ឋានកងរាជអាវុធហត្ថស្រុក អធិការដ្ឋាននគរបាលស្រុក ) មន្ត្រីឧទ្យានុរក្សតំបន់ប្រើប្រាស់ច្រើនយ៉ាងស្នាក់ការកំពង់ឃ្លាំង ដឹកនាំដោយលោក ជុំ ចាន់ថេង អភិបាលរង នៃគណៈអភិបាលស្រុក ចុះត្រួតពិនិត្យ ទប់ស្កាត់ និងបង្រាបបទល្មើសនេសាទខុសច្បាប់ក្នុងដែននេសាទសហគមន៍កំពង់ឃ្លាំង ឃុំកំពង់ឃ្លាំង ស្រុកសូទ្រនិគម កាលពីថ្ងៃទី ០៤ ខែ មករា ឆ្នាំ២០២៥ កន្លងទៅ។ កិច្ចសហប្រតិបត្តិការនេះ មានកម្លាំងចូលរួម ចំនួន ១២នាក់ និងប្រើប្រាស់កាណូត ចំនួន ០២ គ្រឿង ។
ក្នុងកិច្ចប្រតិបត្តិការនេះ ក្រុមចម្រុះបានប្រទះឃើញ និងបង្ក្រាបបាននូវករណីល្មើស ចំនួន ០២ ករណី ។
១-នេសាទដោយឧបករណ៍លបលូដែលមានក្រឡាតូចជាង៣សង់ទីម៉ែត្រ ៖ -ក្បាលលបលូ ចំនួន ០៧ គ្រឿង -របាំងសាច់អួន ប្រវែង ៦០០ម -ចម្រឹង ចំនួន ២០០ ដើម
២-នេសាទដោយឧបករណ៍ស្បៃមុង ៖ -ក្បាលស្បៃមុង ចំនួន ១០គ្រឿង -របាំងសាច់ស្បៃមុង ប្រវែង ៩០០ម -ចម្រឹងចំនួន ៣០០ ដើម ។
ជាលទ្ធផល ក្រុមការងារចម្រុះបានសម្រច កាប់បំផ្លាញ និងដុតចោលនៅនឹងកន្លែង នូវឧបករណ៍នេសាទល្មើសច្បាប់ ។ ដោយឡែក ត្រី ចំនួន ២០ គក្រ ត្រូវបានលែងចូលបឹងធម្មជាតិវិញ ៕
