ភ្នំពេញ ៖ ពិធីដង្ហែសពរបស់សម្តេចអគ្គមហាធម្មពោធិសាល ជា ស៊ីម បានចាប់ផ្តើមចេញពីភូមិគ្រឹះរបស់សម្តេចក្នុងសង្កាត់ទន្លេបាសាក់ ខណ្ឌចំការមន ទៅកាន់វត្តបទុមវត្តី ដោយមានថ្នាក់ដឹកនាំរដ្ឋសភា ព្រឹទ្ធសភា រាជរដ្ឋាភិបាល មន្ត្រីរាជការ ព្រះសង្ឃ និងប្រជាជនយ៉ាងច្រើនកុះករចូលរួមនាព្រឹកថ្ងៃទី១៩មិថុនានេះ ។ សម្តេចជាស៊ីម បានទទួលមរណភាព នៅថ្ងៃទី៨ ខែមិថុនា ឆ្នាំ២០១៥ ក្នុងជន្មាយុ ៨៣ ឆ្នាំ។ សពរបស់សម្តេច ត្រូវបានដង្ហែពីភូមិគ្រឹះរបស់សម្តេច នៅបុរីចំការមន មកកាន់មេរុ នៅមុខវត្តបទុមវត្តី ដើម្បីបូជា នាព្រឹកថ្ងៃទី១៩មិថុនា ។
សម្រាប់ពិធីបូជាវិញព្រះករុណា ព្រះបាទសម្តេច ព្រះនរោត្តម សីហមុនី ព្រះមហាក្សត្រ នៃព្រះរាជាណាក្រកម្ពុជា ព្រះអង្គបានយាងជារាជាធិបតី និងប្រទានភ្លើងបូជាសព សម្តេច ជា ស៊ីម ផងដែរ ។
ប្រមុខរាជរដ្ឋាភិបាលបានចេញសារាចរ សម្រេចឲ្យមន្ត្រីរាជការ និងកងកម្លាំងប្រដាប់អាវុធទាំងអស់ ឈប់សម្រាកមួយថ្ងៃ នៅថ្ងៃទី១៩មិថុនា ដើម្បីចូលរួមដង្ហែ នៅថ្ងៃបូជាសពសម្តេចជាស៊ីម។ រាជរដ្ឋាភិបាល ក៏បានកំណត់យកថ្ងៃទី១៩មិថុនា ជាថ្ងៃកាន់ទុក្ខ ដោយត្រូវបង្ហូតទង់ជាតិ ត្រឹម ១ ភាគ ៣ នៃដង និងហាមឃាត់ មិនឲ្យទូរទស្សន៍ ព្រមទាំងក្លឹបកំសាន្ត បញ្ចាំងទស្សនីយភាពសប្បាយគគ្រឹកគគ្រេង និងបើកច្រៀងរាំកំសាន្ត នោះទេ នៅថ្ងៃទី១៩មិថុនានេះ ។
គួរបញ្ជាក់ថា សម្តេចអគ្គមហាធម្មពោធិសាល ជា ស៊ីម ជាប្រធានព្រឹទ្ធសភា នៃព្រះរាជាណាចក្រកម្ពុជា ចាប់តាំងពីឆ្នាំ១៩៩៩ រហូតដល់ ពេលបច្ចុប្បន្ន ។ សម្តេច គឺជាអ្នកនយោបាយជាន់ខ្ពស់ និងជាប្រធានគណបក្សប្រជាជនកម្ពុជា ដែលជាគណបក្សកាន់អំណាចយូរបំផុតនៅប្រទេសកម្ពុជា សម័យបច្ចុប្បន្ន។
សាលារាជធានីភ្នំពេញ ក៏បានប្រកាសឲ្យប្រជាពលរដ្ឋ ដែលតែងតែហាត់ប្រាណនៅសួនច្បាប់មុខវត្តបុទុម សួនច្បារនាគបាញ់ទឹក និងវិមានឯករាជ្យ សូមផ្អាកការហាត់ប្រាណមួយព្រឹក គឺនៅថ្ងៃទី១៩ ខែមិថុនា ឆ្នាំ២០១៥ ពីព្រោះជាថ្ងៃ ដែលបូជាសពសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា នៅមុខវត្តបទុមវត្តី ៕
