ឯកឧត្តម គួច ចំរើន ទទួលស្វាគមន៍ និងពិសាអាហារសាមគ្គីជូនចំពោះព្រឹទ្ធាចារ្យ ម៉ក់ ហឿន អ្នកលេងបណ្តាញសង្គមនៅសហរដ្ឋអាមេរិក និងក្រុមការងារ

លោកព្រឹទ្ធាចារ្យ ម៉ក់ ហឿន អ្នកលេងបណ្តាញសង្គមនៅសហរដ្ឋអាមេរិក បានមានប្រសាសន៍ឱ្យដឹងថា នេះជាដំណើរទស្សនកិច្ចលើកទី២ មកកាន់ខេត្តព្រះសីហនុ កាលពីឆ្នាំ២០២២ លោកបានមកឃើញពីការពិតវាយ៉ាងម៉េចនៅកម្ពុជា នៅពេលឃើញហើយខ្ញុំគាំទ្រ និងចង់រក្សាអ្វីដែលយើងបានទទួលសម្រាប់ប្រជាពលរដ្ឋខ្មែរតទៅមុខទៀត។ ឆ្នាំ២០២៣នេះ ខ្ញុំក៏បានមកកាន់កម្ពុជាម្តងទៀត ដើម្បីចូលរួមការបោះឆ្នោត ជ្រើសតាំងតំណាងរាស្ត្រ នីតិកាលទី៧ នៅកម្ពុជា ដើម្បីបង្កើតរាជរដ្ឋាភិបាល ដែលមានស្មាដៃ ដែលយើងខ្ញុំមិននឹកស្មានថា ប្រទេសខ្ញុំបានរីកចម្រើនមកដល់ប៉ុណ្ណឹងនោះទេ។

លោកព្រឹទ្ធាចារ្យ បានបន្តថា សម្រាប់រូបលោកបានមើលឃើញការបោះឆ្នោតនៅកម្ពុជា គឺល្អត្រឹមត្រូវឥតខ្ចោះហើយ ប៉ុន្តែបើយើងស្តាប់មតិ អ្នកដែលគេមិនចង់ឱ្យយើងរីកចម្រើន យើងសប្បាយរស់នៅដោយសុខដុមរមនា ព្រោះខ្ញុំនិយាយពីការពិតនៅស្រុកខ្ញុំ (សហរដ្ឋអាមេរិក) បោះឆ្នោតមិនបានអ៊ីចឹងនោះទេ គេផ្ញើមកឱ្យយើងបោះ នៅពេលបោះរួចផ្ញើឱ្យទៅគេវិញ មិនដឹងគេយកទៅរាប់កន្លែងណា យើងអត់ដឹងនោះទេ ដឹងពេលគេប្រកាសថា អ្នកណាចាញ់ អ្នកណាឈ្នះ ។ ក៏ប៉ុន្តែនៅកម្ពុជាគេបោះឆ្នោតកន្លែងណា គេរៀបចំរាប់សន្លឹកឆ្នោតនៅកន្លែងនឹង ហើយការចូលទៅបោះឆ្នោតទៀត វាមានរបៀបរៀបរយ អ្នកទី១ មិនអាចដឹងអ្នកទី២ ហើយអ្នកទី២ មិនដឹងអ្នកទី៣ សម្រេចលើបុគ្គលអ្នកបោះឆ្នោតជ្រើសរើសវាសនាអនាគតខ្លួនឯង ។

លោកព្រឹទ្ធាចារ្យ ម៉ក់ ហឿន បានបន្តទៀតថា ការមកដល់ខេត្តព្រះសីហនុលើកទី១ នៅពេលយប់ ដោយមានការទទួលស្វាគមន៍ ពីឯកឧត្តម អភិបាលខេត្តព្រះសីហនុ យើងមិនបានឃើញទិដ្ឋភាពអស់នេះទេ ក៏ប៉ុន្តែពេលនេះមកពេលថ្ងៃ ខ្ញុំបានឃើញអ្វីៗដែលមិននឹកស្មាន ខ្ញុំចាកចេញពីប្រទេសកម្ពុជាចុងឆ្នាំ១៩៨២ ឬដើម១៩៨៣ ។ ដោយឡែកនិយាយពីខេត្តកំពង់សោម ខ្ញុំបានបែកតាំងពីឆ្នាំ១៩៦២ ខេត្តកំពង់សោម ពេលនោះមិនមានស្អីអញ្ចឹងនោះទេ មិនមានថ្ងៃរះ ភ្លៀងរលឹមរហូត មកដល់ពេលនេះវាមានអគារស្កឹមស្កៃគ្រប់ទីកន្លែងរាប់មិនអស់នោះទេ ។

លោកព្រឹទ្ធាចារ្យ ម៉ក់ ហឿន បានបញ្ជាក់ថា កាលមកលើកទី១ លោកបានឃើញផ្ទាល់ពេញភ្នែក អញ្ចឹងគណបក្សប្រឆាំងនិយាយយ៉ាងម៉េចនិយាយទៅ តែខ្ញុំមកឃើញយ៉ាងណា យកទៅផ្សព្វផ្សាយយ៉ាងនោះ ក្រោយពីការផ្សព្វផ្សាយមានអ្នកជឿខ្ញុំ និងជឿអ្នកប្រឆាំង ពួកគេមកឃើញយល់ដឹងមួយចំនួន ។ អញ្ចឹងខ្ញុំមើលឃើញអ្នកនយោបាយ ហាក់ដូចជាទៅលែងរួច ដើរភរភូត បោកប្រាស់មនុស្សសម័យថ្មី ដែលមិនដឹងប្រវត្តិសាស្ត្រ គេក៏បានឃើញពេញភ្នែកហើយ គេមានការគិតច្បាស់លាស់ និងសូមផ្តាំផ្ញើទៅប្រជាពលរដ្ឋខ្មែរក្នុងស្រុក ក្រៅស្រុកក្តីចុះមកមើលកុំជឿខ្ញុំ ១០០ភាគរយ ហើយក៏កុំជឿអ្នកនយោបាយ យើងត្រូវជឿលើខ្លួនយើង កុំជឿតាមត្រចៀក គឺជឿតាមភ្នែក ហើយយើងគិតថា ប្រទេសត្រូវមានរដ្ឋាភិបាល ហើយរដ្ឋាភិបាលធ្វើ ដើម្បីយើងទាំងអស់គ្នា ធ្វើដើម្បីប្រទេសយើង កូនចៅរបស់យើង ព្រោះមនុស្សកើតមកចាស់ ឈឺស្លាប់ យើងត្រូវមានការពិចារណា អ្វីដែលជាការល្អសម្រាប់យើងគ្រប់គ្នា ។ ព្រោះកូនយើងកើតមកមានសាលារៀន ក្រុមគ្រួសារមានជំងឺ មានពេទ្យព្យាបាល មានផ្ទះសម្បែង ផ្លូវខ្វាត់ខ្វែងដូចសព្វថ្ងៃ គឺគ្មានអ្វីត្រូវដូរចិត្ត ដូរគំនិតរកអ្នកថ្មី យើងត្រូវរួមគ្នាគិតទាំងអស់គ្នា ៕