(ភ្នំពេញ)៖ ឯកឧត្តម លីវ សុផាណារិទ្ធិ រដ្ឋលេខាធិការក្រសួងប្រៃសណីយ៍ និងទូរគមនាគមន៍ ក្នុងឱកាស អញ្ជើញចូលរួមជាវាគ្មិន ពិធីបើកវគ្គបណ្តុះបណ្តាលពិសេស «តួនាទីសារព័ត៍មានក្នុងដំណើរការបោះឆ្នោត, ការពង្រឹងតួនាទីសារព័ត៍មាន ក្នុងបរិបទឌីជីថល និងធ្វើការអ្នកនាំពាក្យ» ដែលរៀបចំឡើងដោយ សហភាពសហព័ន្ធអ្នកសារព័ត៌មានកម្ពុជា បានមានប្រសាសន៍ទាក់ទងនឹង ប្រធានបទ «ការវិវត្តន៍ជឿនលឿននៃបច្ចេកវិទ្យាព័ត៌មានវិទ្យានៅក្នុងវិស័យសារព័ត៌មាន និងអ្វីទៅសុវត្ថិភាព Internet? និង ការចាប់យកឌីជីថលទៅក្នុងការងារព័ត៌មាន និងពង្រីកការផ្សព្វផ្សាយ» ។
ក្នុងពិធីនេះ ឯកឧត្តម លីវ សុផាណារិទ្ធិ រដ្ឋលេខាធិការក្រសួងប្រៃសណីយ៍ បានផ្តំាំឱ្យពលរដ្ឋប្រុងប្រយ័ត្ន ១២ ចំណុច ក្នុងការប្រើប្រាស់ប្រព័ន្ធអ៊ីនធឺណិត រួមមាន៖
ទី១៖ គួរធ្វើការស្វែងយល់ពី គេហទំព័រក្លែងក្លាយ
ទី២៖ ការបោកបញ្ឆោតនៅតាមអ៊ីម៉ែល (Spam)
ទី៣៖ គួរពិនិត្យ និងប្រើប្រាស់គេហទំព័រដែលមិនបានជ្រើសរើសការប្រើប្រាស់ HTTPS
ទី៤៖ គួរមានការប្រើប្រាស់កម្មវិធីកំចាត់មេរោគ
ទី៥៖ ស្វែងយល់ពីបញ្ជាប់ (Links) ដែលគួរឲ្យសង្ស័យ (Clickjacking Attack)
ទី៦៖ កុំចុច ឬបើក ការបង្ហាញផ្ទាំង Pop-Up មិនចង់បាន
ទី៧៖ ប្រុងប្រយ័ត្នចំពោះ WiFi សាធារណៈ
ទី៨៖ ធ្វើការអាប់ដេតប្រព័ន្ធប្រតិបត្តិការ និងកម្មវិធីនានាឱ្យទៀតទាត់
ទី៩៖ ត្រូវប្រើប្រាស់ពាក្យសម្ងាត់ដែលខ្លាំង
ទី១០៖ ត្រូវប្រុងប្រយ័ត្នចំពោះអ្វីដែលយើងបានដោតឡូន
ទី១១៖ ស្វែងយល់ពីវិស្វកម្មសង្គម (Social Engineering Free ware)
ទី១២៖ ត្រូវប្រើប្រាស់មុខងារផ្ទៀងផ្ទាត់ពីរជំហាន(Two StepVerification) លើបណ្តាញសង្គម៕
សូមជំរាបថា សហភាពសហព័ន្ធអ្នកសារព័ត៌មានកម្ពុជា បើកវគ្គបណ្តុះបណ្តាលពិសេស «តួនាទីសារព័ត៍មានក្នុងដំណើរការបោះឆ្នោត, ការពង្រឹងតួនាទីសារព័ត៍មាន ក្នុងបរិបទឌីជីថល និងធ្វើការអ្នកនាំពាក្យ» មានរយៈពេល ២ថ្ងៃ ចាប់ពីថ្ងៃទី ២២ ដល់ថ្ងៃទី ២៣ ខែមិថុនា ឆ្នាំ២០២៣។ នៅក្នុងវគ្គបណ្តុះបណ្តាលពិសេសនេះ មានសិក្ខាកាមចូលរួមប្រមាណជា ១០០នាក់ នឹងទទួលបានការចែករំលែកបទពិសោធន៍ និងចំណេះដឹងជាមូលដ្ឋានពីគ្រូឧទ្ទេសជំនាញៗ ៧រូប តាមរយៈបទបង្ហាញចំនួន ៧ រួមមាន៖
១.ក្រមសីលធម៌សម្រាប់ប្រព័ន្ធផ្សព្វផ្សាយនៅក្នុងដំណើរការបោះឆ្នោត និងក្រមសីលធម៌របស់អ្នកសង្កេតការណ៍បោះឆ្នោត។
២.ការត្រៀមខ្លួនរបស់អ្នកសារព័ត៌មានទាក់ទិនការបោះឆ្នោត និងមុំព័ត៌មានសំខាន់ៗទាក់ទិនការបោះឆ្នោត
៣.ការចាប់យកឌីជីថលទៅក្នុងការងារព័ត៌មាន ដើម្បីពង្រីកការផ្សព្វផ្សាយ និងអ្វីទៅសុវត្ថិភាព Internet?
៤.ស្វែងយល់ពីការដឹកនាំគ្រប់គ្រងអង្គភាពសារព័ត៌មាន និងការស្វែងរកទីផ្សារ ហិរញ្ញវត្ថុ សម្រាប់ទ្រទ្រង់អាជីវកម្មសារព័ត៌មាន។
៥.ស្វែងយល់ពីកិច្ចការអ្នកនាំពាក្យ កិច្ចការសាធារណៈ និងការងារផ្សព្វផ្សាយមហាជន។
៦.ស្វែងយល់ពីវិធីបង្ការសុវត្ថិភាពសម្រាប់អ្នកសារព័ត៌មានក្នុងពេលចុះបំពេញការងារ, ការយល់ដឹងជាមូលដ្ឋានរបៀបដោះស្រាយលើសំណើទាមទារការកែតម្រូវខ្លឹមសារផ្សាយ, និងការដោះស្រាយបណ្តឹងនៅតុលាការ។
៧. តួនាទីសារព័ត៌មាននិងសិទ្ធិបញ្ចេញមតិ នៅក្នុងដំណើរការប្រជាធិបតេយ្យ, ការកសាងសន្តិភាព, និងការកសាងសង្គមស៊ីវិល័យ៕
