ខេត្តប៉ៃលិន ៖ បន្ទាប់ពីសារព័ត៌មានកាសែតកោះសន្តិភាព បានចុះផ្សាយ កាលពីថ្ងៃទី១៦ ខែវចិ្ឆកា កន្លងទៅ ថាមានរថយន្ត១គ្រឿង របស់អនុប្រធានរដ្ឋបាលព្រៃឈើខេត្តប៉ៃលិន ត្រូវបានកងកម្លាំងសមត្ថកិច្ចយោធាសឹករងខេត្ត ឆ្មក់ដេញស្ទាក់ចាប់ឃាត់បានទាំងឈើប្រណិត និងឈើដុំជាច្រើ ន ព្រមទាំងអ្នកបើកបររថយន្តម្នាក់នោះ ។ រហូតមកដល់ព្រឹកថ្ងៃទី០១ ខែធ្នូ នេះ លោក ឡាយ ពិសិដ្ឋ នាយរងផ្នែករដ្ឋបាលព្រៃឈើប៉ៃលិន បានប្រតិកម្មយ៉ាងខ្លាំង ថា រថយន្ត និងឈើទាំងនោះមិនមែនជារបស់ខាងលោកឡើយ ។
សូមបញ្ជាក់ថា កាលពីដើមខែវិច្ឆិការ កន្លងទៅ សមត្ថកិច្ចយោធាសឹករង បានចុះឃាត់រថយ ន្តមួយគ្រឿង ដោយបានឯកភាពពីគណ:កម្មការឯកភាពខេត្ត និងបានទទួលបញ្ជាពីលោកអភិបាលខេត្ត ដើម្បីឱ្យកម្លាំសឹករងយោធា ចុះបង្ក្រាបបទល្មើសព្រៃឈើឆ្លងដែន និងបំផ្លាញព្រៃ តាមព្រំដែនកម្ពុជា ថៃ ខុសច្បាប់ ។ ក្រោយពីបានឃាត់រថយន្តមួយគ្រឿងរួមជាឈើ និងមនុស្ស គេសង្ស័យថា រថយន្តមួយគ្រឿងដែលចាប់បាននោះ ជារថយន្តរបស់ខាងរដ្ឋបាលព្រៃឈើខេត្តប៉ៃលិន ដោយដឹកឈើនោះបម្រុងយកទៅក្រុងប៉ៃលិន លុះទទួលបានដំណឹងពីប្រជាពលរដ្ឋរាយការណ៍ក៏ចុះធ្វើការ ស្ទាក់ឃាត់បានតែម្តង ។
តែបើតាមលោក ឡាយ ពិសិដ្ឋ នាយរងរដ្ឋបាលព្រៃឈើប៉ៃលិន បានប្រតិកម្មកាលពីព្រឹកថ្ងៃទី០១ ខែធ្នូ ឆ្នាំ២០១៧ នេះថា ទាំងរថយន្ត និងឈើទាំងអស់ក្នុងរថយន្តនោះ មិនមានការទាក់ទងនឹងខាងលោក ឬនឹងខាងមន្ត្រីរបស់លោកឡើយ ព្រោះរថយន្តនោះ អត់មានស្លាកលេខត្រឹមត្រូវ ហើយខាងមន្ត្រីរបស់លោក ក៏អត់បានប្រើប្រាស់រថយន្តដូចខាងលើនោះដែរ ។
លោកបន្តទៀតថា រហូតមកដល់ពេលនេះ ទាំងរថយន្តនិងឈើ ត្រូវបានខាងមន្ត្រីយោធាផ្នែកសឹករងយកទៅរក្សាទុកនៅក្នុងបន្ទាយ កំពុងស្រាវជ្រាវរកម្ចាស់ ដើម្បីចាត់ការ តាមផ្លូវច្បាប់ ៕ ដោយ ៖ នីយ៉ា
