ខេត្តបន្ទាយមានជ័យ ៖ មន្ទីរសាធារណការដឹកជញ្ជូន និងអាជ្ញាធរដែនដីខេត្តបន្ទាយមានជ័យ និងចាត់វិធានការចំពោះក្រុមហ៊ុន ឬអាជីវករជាម្ចាស់ អ្នកបើកបររថយន្តធុនធំៗ ផ្ទុកធ្ងន់ៗដែលបានដឹកជញ្ចូន បង្កអោយខូចខាតធ្ងន់ធ្ងរនូវផ្លូវខេត្ត ក្រាលកៅស៊ូចាប់ពីចំណុចផ្លូវបំបែក ផ្លូវជាតិលេខ៦ ត្រង់ព្រៃមាន់ទៅអាងត្រពាំងថ្មស្រុកភ្នំស្រុក ខេត្តបន្ទាយមានជ័យ។
លោក គោស៊ុំ សារឿត អភិបាលខេត្តបន្ទាយមានជ័យ បាននិយាយនៅកន្លែងសាលប្រជុំធ្វើការ តែងតាំង អភិបាលរងស្រុកភ្នំស្រុកថា: ផ្លូវខេត្តក្រាលកៅស៊ូចូលស្រុកភ្នំស្រុក ពុំមែនអន់គុណភាពទេតែវារងគ្រោះធ្ងន់ម្តងកាលពីទឹកជំនន់ឆ្នាំ២០១៣ ។ បន្ទាប់មករងគ្រោះធ្ងន់ដោយរថយន្តធុនធំ ផ្ទុកធ្ងន់ៗចូលដឹកស្រូវនិងដឹកដីគ្រួសថ្មជួសជុលអាងទឹក យ៉ាងធ្ងន់ធ្ង។ លោកបានស្តីបន្ទោសយ៉ាងខ្លាំង ដល់មន្ត្រីមូលដ្ឋានស្រុកភ្នំស្រុក ដែលមិនបានចាត់ការទាន់ពេល និងធ្វើការការពារផ្លូវកៅស៊ូចូលស្រុកនេះ ឲ្យបានគងវង់នោះឡើយ។
ហើយលោកទាមទារអោយមន្ត្រីអាជ្ញាធរ ដែនដីសហការនឹងមន្ត្រីជំនាញសាធារណការ និងដឹកជញ្ជូនដើម្បីស្រង់និងចាត់ការផ្លូវច្បាប់ ផាកពិន័យដល់ក្រុមហ៊ុនបុគ្គល ដែលណាបង្កបំផ្លាញផ្លូវជាតិនេះ។លោក គឹម សុវណ្ណ ប្រធានមន្ទីរសាធារណការ និងដឹកជញ្ចូនខេត្តបន្ទាយមានជ័យ បានអោយដឹងថា:បុគ្គលឬក្រុមហ៊ុនដឹកជញ្ជូនមានរថយន្តធុនធ្ងន់ បានដឹកជញ្ជូនឆ្លងកាត់ផ្លូវខេត្តក្រាលកៅស៊ូ ទៅភ្នំស្រុកប្រវែង២០ គីឡូម៉ែត្រនេះភាគច្រើនដើម្បីប្រយោជន៍ខ្លួនតែបុណ្ណោះ រថយន្តដែលផ្ទុកលើសកម្រិតកំណត់ បង្កអោយខូចខាតផ្លូវថ្នល់យ៉ាងខ្លាំងអាជ្ញាធរ និងសាធារណការនិងចាត់ការឡានធំណា ដែលបំផ្លាញផ្លូវចូលស្រុកភ្នំស្រុកទៅតាមច្បាប់។
លោកគឹមសុវណ្ណ បានបន្តថាចំនួនរថយន្តដែលដឹកធ្ងន់ នៅក្នុងស្រុកភ្នំស្រុកទាំងអស់ ឲ្យមកធ្វើកិច្ចសន្យា ថ្ងៃមុខឈប់ឲ្យដឹកធ្ងន់បន្តទៀត៕
