គណបក្សប្រជាជនកម្ពុជាបានធើ្វមហាសន្និបាតវិសាមញ្ញត្រូវបានចូលរួមពី សមាជិក សមាជិកានៃគណៈកម្មការធិការកណ្តាល មន្ត្រីគណបក្សជាសមាជិក សមាជិកានៃរដ្ឋសភា ព្រឹទ្ធសភា រាជរដ្ឋាភិបាល អនុរដ្ឋលេខាធិការ មន្ត្រីជាន់ខ្ពស់ និងតំណាងមកពីគណៈកម្មាការធិការគណបក្សគ្រប់គ្រងក្រសួង ស្ថាប័ន រាជធានី ខេត្ត ក្រុង ស្រុក ខណ្ឌសរុបចំនួន១៣៥៩រូប ។
មហាសន្និបាតវិសាមញ្ញរបស់គណបក្សប្រជាជន កម្ពុជាដែលត្រូវបានធ្វើឡើងរយៈពេល៣ថ្ងៃចាប់ពីថ្ងៃទី៣០ខែ មករាដល់ថ្ងៃទី០១ខែកុម្ភៈ បានសម្រេចបន្ថែមសមាជិកថ្មីជាង៣០០រូបបន្ថែមទៀតលើសមាជិកគណៈ កម្មាធិការកណ្តាលដែលមានជាង២៦០រូប ដើម្បីបំពេញតម្រូវការជាក់ស្តែង និងធានាប្រសិទ្ធភាពការងារ។
មហាសន្និបាតក៏បានជំរុញខ្លាំងដំណើរការកែទម្រង់ដ៏ទូលំទូលាយ និងស៊ីជម្រៅដែលត្រូវបានអនុវត្ត និងកំពុងអនុវត្តប្រកបដោយផ្លែផ្កា ដោយកំណត់ថាកំណែទម្រង់ គឺជាការងារដ៏មានសារសំខាន់បំផុតសម្រាប់អាយុជីវិតរបស់ជាតិ និងរបស់គណបក្សប្រជាជនកម្ពុជា។ មហាសន្និបាតបានណែនាំដល់សមាជិកគណបក្សគ្រប់ថ្នាក់ និងមន្ត្រីគណបក្សគ្រប់រូប ត្រូវក្តាប់ជាប់គោលការណ៍នៃកំណែទម្រង់ដែលបានលើកឡើងក្នុង មហាសន្និបាត ហើយចូលរួមអនុវត្តប្រកបដោយការទទួលខុសត្រូវខ្ពស់បំផុត និងដំណើរការកាន់តែលឿន និងកាន់តែមានប្រសិទ្ធភាព។
មហា សន្និបាតក៏បានពិនិត្យវាយតម្លៃយ៉ាងល្អិតល្អន់ចំពោះការងារ បោះឆ្នោតរបស់គណបក្ស ទាំងចំណុចខ្លាំង ចំណុចខ្សោយ ដោយបានដកស្រង់មេរៀនពិសោធន៍មួយចំនួន ព្រមទាំងបានកំណត់ទិសដៅភារកិច្ចសំខាន់ៗ សំដៅត្រៀមលក្ខណៈឲ្យបានគ្រប់គ្រាន់ ដើម្បីធានារក្សាប្រៀបឈ្នះ និងបង្កើនប្រៀបឈ្នះរបស់គណបក្សប្រជាជនក្នុងពេលបោះឆ្នោតនា ពេលខាងមុខនេះ។
មហាសន្និបាតក៏បានជំរុញយ៉ាងសកម្មនូវការអនុវត្តកិច្ច ព្រមព្រៀងរវាងគណបក្សប្រជាជនកម្ពុជា និងគណបក្សសង្គ្រោះជាតិ ឲ្យទទួលបានលទ្ធផលពេញលេញគ្រប់ជ្រុងជ្រោយ ដើម្បីឆ្លើយតបនឹងបំណងប្រាថ្នារបស់ប្រជាជន។
សេចក្តីសម្រេចរបស់មហាសន្និបាតចេញផ្សាយបន្ទាប់ពីមហាសន្និបាតបញ្ចប់ នៅល្ងាចថ្ងៃអាទិត្យនេះ ឲ្យដឹងថាមហាសន្និបាតបានសម្រេច៩ចំណុច ដែលក្នុងនោះមហាសន្និបាតបានបោះឆ្នោតជ្រើសរើសសមាជិក គណបក្សកម្មាធិការកណ្តាលចំនួន៣០៦រូប ។
សេចក្តីសម្រេចបញ្ជាក់ថា«ក្នុងស្មារតីនេះ និងក្នុងទិសដៅធានានូវនិរន្តរភាពនៃបុព្វហេតុរបស់គណបក្ស មហាសន្និបាតបានសម្រេចកែសម្រួលរចនាសម្ព័ន្ធនៃគណៈ កម្មាធិការកណ្តាលពីចំនួន២៦៨រូបដល់៥៤៥រូប ដោយបានលុបឈ្មោះសមាជិកគណៈកម្មាធិការកណ្តាលដែលទទួលមរណភាព២៧រូប បញ្ចេញពីគណបក្ស១រូប លាលែងដោយមូលហេតុសុខភាព ១រូប និងបោះឆ្នោតជ្រើសរើសសមាជិកគណបក្សកម្មាធិការកណ្តាល៣០៦រូប ស្របតាមលក្ខន្តិកៈ និងបទបញ្ជាផ្ទៃក្នុងរបស់គណបក្ស ដើម្បីបង្កើនការដឹកនាំនៅគ្រប់រចនាសម្ព័ន្ធរបស់គណបក្សក្នុងសភាព ការណ៍ថ្មីជាពិសេសបង្កើនបិរមាណមន្ត្រីសកម្ម វ័យក្មេង និងស្ត្រី»។
មហាសន្និបាតក៏បានប្រកាសគាំទ្រយ៉ាងពេញទំហឹងចំពោះការប្រឹងប្រែង របស់រាជរដ្ឋាភិបាលនីតិកាលទី៥ក្រោមការដឹនាំរបស់ សម្តេចនាយករដ្ឋមន្ត្រី ហ៊ុន សែន ក្នុងការអនុវត្តកម្មវិធី នបាយោបាយ និងយុទ្ធសាស្ត្រចតុកោណដំណាក់កាលទី៣ ដែលទទួលបានជោគជ័យក្នុងឆ្នាំដំបូងនេះផងដែរ ៕
