រតនគិរី: ៖ ភ្លើងបានឆេះបន្ទប់ផ្ទះសំណាក់យីហោឆាយវ៉ាង នៅកណ្ដាលក្រុង បានលុបណ្ដាលឱ្យភ្ញៀវស្រីម្នាក់ បានស្លាប់នៅនិងកន្លែង និងយុជនម្នាក់ រងរបួសកាលពីព្រឹក ថ្ងៃទី២៩ខែមករាឆ្នាំ២០១៥។នារីដែលបាត់បង់ ជីវិតមាន ឈ្មោះលីលី អាយុ២១ឆ្នាំ ជនជាតិខ្មែរ មុខរបរបំរើការនៅហាងពន្លឺថ្មី ក្នុងក្រុងបានលុង ខេត្ដ រតនគិរីមានស្រុកកំណើតនៅខេត្ដតាកែវ។
ចំណែកយុវជនរងរបួស ឈ្មោះកុលរិទ្ធី អាយុ២៧ឆ្នាំ ជនជាតិខ្មែរ មុខរបរអ្នកលក់ពងទា មានស្រុកកំណើត នៅខេត្ដព្រៃវែង។ប្រភពព័ត៌មានបានឱ្យដឹងថា កាលពីយប់ថ្ងៃទី២៨ខែមករានេះ មានយុវជនម្នាក់បាននាំ នារីម្នាក់ ជាដៃគូទៅដេកនៅផ្ទះសំណាក់ ឆាយវ៉ាង បន្ទប់លេខ០៣២ ជាន់ទីពី។លុះដល់ម៉ោងជាងប្រាំព្រឹក ថ្ងៃទី២៩ខែមករាដដែល ស្រាប់តែមានផ្សែងភ្លើងចេញពីក្នុងបន្ទប់នោះ ខណ:ពេលពួកគេមិនទាន់ងើបពី ដំណេក ពេលជាមួយគ្នានោះក៏មានយុវជនម្នាក់រត់ចុះមកដី ដោយមានស្នាមរលាកភ្លើង។ម្ចាស់ផ្ទះសង្ស័យ ចេញមកឃើញភ្លើងកំពុងឆេះបន្ទប់ ០៣២នោះក៏ឆោឡោ ឱ្យគេឯងជួយអន្ដរាគមន៏។
ប្រភពបានបន្ដឱ្យដឹងទៀតថា ដោយឃើញហេតុការណ៏ ឆេះបន្ទប់ផ្ទះសំណាក់ខាងលើ នៅកណ្ដាលក្រុង ភ្លាមនោះ មានឡានទឹករបស់ប៉ូលិស បានបើកសំដៅទៅជួយពន្លត់ ធ្វើឱ្យភ្លើងបានស្ញប់ស្ងាត់ទៅវិញ មិន បង្ករាលដាលដល់បន្ទប់ផ្សេងៗឡើយ។ក្រោយពីភ្លើងរលត់មួយសន្ទុះ សមត្ថកិច្ចនិងព្រះរាជអាជ្ញារងម្នាក់ បានចុះទៅពិនិត្យហើយ បានរកឃើញសាកសពនារីម្នាក់ ស្លាប់ស្ដូកស្ដឹងនៅលើគ្រែ បន្ទប់លេខ០៣២ នោះ។
សមត្ថកិច្ចបានសន្និដ្ឋានជាបឋមថា ករណីនារីម្នាក់ដែលស្លាប់ នៅក្នុងបន្ទប់ផ្ទះសំណាក់ ឆាយវ៉ាង គឺអាច បណ្ដាលមកពីទុស្សេខ្សែភ្លើង ឆេះបន្ទប់ហើយរត់មិនរួច ទើបបណ្ដាលឱ្យឆេះខ្លួន រហូតដល់ស្លាប់។ក៏ប៉ុន្ដែ អ្នកចូលរួមពិនិត្យខ្លះ បានឱ្យដឹងដែរថាមូលហេតុអ្វីបើភ្លើងឆេះ មែនក៏កំរាលពូកដែលនៅពីក្រោម សាកសពម៉ិចមិនឃើញឆេះសោះ បែរជាឆេះតែសាកសពរោលៗ ដូចគេចាក់សាំដុតឱ្យស្លាប់ ហើយលើក សពដាក់លើគ្រែ។នៅកន្លែងកើតហេតុនោះ សមត្ថកិច្ចបានសាក់សួរមនុស្សស្រីម្នាក់ ដែលជាមិត្ដភ័ក្ដ្រ រាប់អាន ជាមួយនារី រងគ្រោះនោះគេថាកន្លងមក គេតែងតែណែនាំលីលីថា កុំឱ្យមានសង្សារច្រើនពេក មិនល្អឡើយក្រែងមាន គេស្អប់ទៅថ្ងៃក្រោយប៉ុន្ដែនារីដែលស្លាប់នោះ មិនព្រមស្ដាប់ឡើយ។
ទោះជាយ៉ានេះក្ដី ប៉ូលិសបានឱ្យដឹងថា នារីរងគ្រោះបាត់បង់ជីវិតមាន ឈ្មោះ ថាលីលី អាយុ២១ឆ្នាំ មានស្រុកកំណើតនៅខេត្ដតាកែវ មកដល់ ពេលនេះពុំមានសាច់ញាតិ មកទទួលយកទៅបូជាសពទេ តែត្រូវប៉ូលិសដឹកទៅដំកល់ទុកនៅវត្ថភូមិថ្មី។ចំណែកយុវជនរងរបួស ឈ្មោះ កុលរិទ្ធី រងបួសមុខនិងដៃ បច្ចុប្បន្នសម្រាកព្យាបាល នៅមន្ទីរពេទ្យបង្អែកខេត្ដ ៕
