ខេត្តប៉ៃលិន ៖ រសៀលថ្ងៃទី២៣ ខែមករា ឆ្នាំ២០១៥ លោក កើត សុធា អភិបាល នៃគណៈអភិបាលខេត្តប៉ៃលិន បានអញ្ជើញជាគណអធិបតីក្នុងការបិទ សន្និបាតបូកសរុបវាយ តម្លៃការងារអប់រំ ឆ្នាំ២០១៣-២០១៤ និងទឹសដៅបន្តឆ្នាំ២០១៤-២០១៥ នៅមន្ទីរអប់រំ យុវជននិងកីឡាខេត្តប៉ៃលិន ដោយមានការចូលរួមពីលោក លោកស្រីដែលជាអភិបាលរងខេត្ត លោកប្រធាន អនុប្រធានមន្ទីរជុំវិញខេត្ត លោកស្នងការ ស្នងការរងខេត្ត លោកដែលជាតំណាងសហគមន៏អប់រំតាមមូលដ្ឋាន លោកគ្រូ អ្នកគ្រូ និងអាជ្ញាធរដែនដី យ៉ាងច្រើនកុះករ ។
លោក តង់ ធារ៉ា ប្រធានមន្ទីរអប់រំ យុវជននិងកីឡាខេត្តប៉ៃលិន បានឲ្យដឹងថា៖ នៅរៀងរាល់មួយឆ្នាំម្តង សន្និបាទត្រួវបានធ្វើឡើង តាមការប្រជុំបចេ្ចកទេស របស់មន្ត្រីគ្រប់លំដាប់ថ្នាក់ អាជ្ញាធរដែនដី មាតាបីតាសិស្ស សហគមន៏ ដើម្បីគុំទ្រវាយតម្លៃការងារអប់រំ យុវជននិងកីឡាឆ្នាំសិក្សាចាស់ ព្រមទាំងលើកទឹសដៅការងារអប់រំឆ្នាំសិក្សាថ្មី ។លោកបន្តទៀតថា៖ សន្និបាទបូកសរុបវាយតម្លៃការងារអប់រំឆ្នាំសិក្សាថ្មី២០១៣-២០១៤នេះ បានឆ្លុះបញ្ជាំអំពីចំនុចសំខាន់ៗ ដែលត្រួវកែលំអ និងដោះស្រាយឲ្យមានប្រសិទ្ធភាព ហើយឆ្នាំសិក្សាថ្មីនេះ ថ្នាក់ដឹកនាំ មន្ត្រីអប់រំទាំងអស់ បន្តខិតខំអនុវត្តន៏នូវគោលនយោបាយ កែទម្រង់ស៊ីជំរៅរបស់ក្រសួងអប់រំ យុវជននិងកីឡា ដើម្បីឲ្យវិស័យអប់រំខេត្តប៉ៃលិនរីកចំរើនឡើង ។
ថ្លែងក្នុងឱកាសបិទសន្និបាទនោះដែរ លោក កើត សុធា អភិបាល នៃគណៈអភិបាលខេត្តប៉ៃលិន បានជំរុញឲ្យថ្នាក់ដឹកនាំ មន្ត្រី បុគ្គលិកសិក្សាអប់រំទាំងអស់ ត្រួវយកចិត្តទុកដាក់ បន្តអនុវត្តន៏នូវគោលការសិក្សាអប់រំមូលដ្ឋាន និងខ្លឹមសារអប់រំដល់សិស្សានុសិស្សគ្រប់ភូមិសិក្សា ឲ្យមានគុណភាព និងប្រសិទ្ធភាពថែមទៀត ដើម្បីកសាងយុវជនជំនាន់ថ្មី ដែលនិងត្រៀមខ្លួនចូលសមាហរណកម្មយុវជនអាស៊ាន នៅចុងឆ្នាំ២០១៥ខាងមុខនេះ ប្រកបដោយសមត្ថភាព និងគុណភាពពេញលិញក្នុងការប្រកូតប្រជែងទីផ្សារការងារជាមួយយុវជនអស៊ាន ។
លោកបន្តថា ៖ ក្នុងអាណត្តិទី៥នេះ រាជរដ្ឋាភិបាលកម្ពុជា ក្រោមការដឹកនាំរបស់សម្តេច ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអនុវត្តន៏នូវគោលនយោបាយ កែទម្រង់ ស៊ីជំរៅលើគ្រប់វិស័យក្នុងនេះវិស័យអប់រំ យុវជន និងកីឡា បានកំពុងអនុវត្តន៏ប្រកបដោយគុណភាព និងប្រសិទ្ធភាពខ្ពស់ ។ ជាក់ស្តែងខេត្តប៉ៃលិន មានសាលារៀន នៅគ្រប់ទីកន្លែង តាំងពីទីប្រជុំជន រហូតដល់តំបន់ដាច់ស្រយាល ដើម្បីផ្តល់ឪកាសដល់សិស្សានុសិស្សបានចូលរៀនគ្រប់ៗគ្នា ។
ទន្ទឹមនេះដែរគ្រូបង្រៀន បានទទូលប្រាក់បៀវត្តន៏សមរម្យ ដូច្នោះមន្ត្រីអប់រំទាំងអស់ ត្រួវមានស្មារតីទទូល ខុសត្រួវខ្ពស់ ក្នុងការបណ្តុះបណ្តាលធនធានមនុស្ស ឲ្យមានប្រសិទ្ធភាព ៕
អត្ថបទ សេង សុវណ្ណារិទ្ធ
