មណ្ឌលគិរី ៖ សាកសពមនុស្សម្នាក់ត្រូវបានគេប្រទះឃើញ ហើយរាយការណ៍ ដល់សមត្ថកិច្ច កាលពីវេលាម៉ោង១៦ថ្ងៃទី១៦ ខែមករា ឆ្នាំ២០១៧ នៅចំណុចលើនៃចុងតារាងយន្តហោះ កណ្តាលក្រុងសែន មនោរម្យ ខេត្តមណ្ឌលគិរី ។
តាមពលរដ្ឋជាច្រើននាក់ដែលមកមើលឃើញសាកសព ពួកគាត់មានការសង្ស័យថា ជាករណីឃាតកម្ម ស្របពេលដែលសមត្ថកិច្ចខេត្តមណ្ឌលគិរី បើកការសន្និដ្ឋាន ជាបឋមថា ជាករណីអត្តឃាតនោះទេ ។
បើមើលតាមការជាក់ស្ដែង សភាពសាកសពរលួយសាច់អស់នៅតែគ្រោងឆ្អឹង ជនរងគ្រោះអាចស្លាប់រយៈពេលយួរណាស់មកហើយ។
លោក សូ សុវណ្ណ ស្នងការរងនៃស្នងកាដ្ឋាននគបាលខេត្តមណ្ឌលគីរី បានប្រាប់អោយ ដឹងថា សាកសពជនរងគ្រោះខាងលើត្រូវបាន អ្នករត់ម៉ូតូឌុប ប្រទះឃើញ នៅល្ងាចថ្ងៃទី១៦នេះ ហើយគាត់បានមករាយការដល់ប៉ូលិស លោកថា ជាបឋម សមត្ថកិច្ចសន្និដ្ឋានជាករណីអត្តឃាត សមត្ថកិច្ចនៅមិនទាន់ដឹង ពីអត្តសញ្ញាណសពនៅឡើយទេ ។
សាកសពខាងលើ អាចនឹងស្លាប់រយៈពេលយ៉ាងតិច៦ខែមកហើយ ហើយក្រុមការងារជំនាញកំពុងធ្វើការស្រាវជ្រាវលើករណីនេះ ។ លោកបន្តថា កាលពី៦ខែមុន នៅឃុំពូជ្រៃ ស្រុកពេជ្រាដា មានករណីមនុស្សប្រុសបាត់ខ្លួនម្នាក់ លោកកំពុងបញ្ជាអោយមេប៉ុស្គិ៍នៅទីនោះ ស្រាវជ្រាវសាចញាតិ អោយមកមើលសព ដែលស្លាប់នៅលើចុងតារាងយន្តហោះខាងលើនេះ ក្រែងមានតំរុយខ្លះ ៕
ដោយ ៖ សន ចាន់ឌី
