ខេត្តកំពត៖ សពដូនចាស់ម្នាក់ត្រូវបានប្រជាពលរដ្ឋប្រទះឃើញស្លាប់អណ្តែតក្នុងទឹកព្រែកកំពតកាលពីវេលាម៉ោង10ព្រឹក ថ្ងៃទី17មករា ឆ្នាំ2017ស្ថិតចំណុចស្ពានត្រើយកោះផ្នែកខាងជើង ក្នុងភូមិទ្វីរខាងត្បូង សង្កាត់អណ្តូងខ្មែរ ក្រុង-ខេត្តកំពត។ ទាក់ទិននឹងការប្រទះឃើញសពខាងលើនេះត្រូវបានសាច់ញាតិបង្ហើបប្រាប់ថា ដូនចាស់ដែលត្រូវជាម្តាយមានឈ្មោះ ងួន យាន ភេទស្រី អាយុ87ឆ្នាំ រស់នៅជាមួយគាត់ក្នុងភូមិទ្វីរខាងត្បូង សង្កាត់អណ្តូងខ្មែរ ក្រុងកំពត ។
សាច់ញាតិរបស់សពបានបញ្ជាក់ទៀតថាដូនចាស់រងគ្រោះដែលត្រូវជាម្តាយបានបាត់ខ្លួននាវេលាម៉ោង7ព្រឹក ថ្ងៃទី17មករានេះ ខណៈដែលពួកគាត់ចេញទៅប្រកបអាជីវកម្ម ប៉ុន្តែមុននឹងចាកចេញគាត់ក៏បានឱ្យប្រាក់មួយចំនួនសំរាប់ពិសារចំណីអាហារនិងមួយផ្នែកប្រគេនព្រះសង្ឃ លុះនៅវេលាម៉ោងប្រហែល10ព្រឹកក្នុងថ្ងៃដដែល ស្រាប់តែមានគេប្រទះឃើញគាត់លង់ទឹកស្លាប់ទៅហើយ។
ពាក់ព័ន្ធនឹងករណីសពអណ្តែតទឹកខាងលើសមត្ថកិច្ចជំនាញក៏បានមកពិនិត្យ ធ្វើកោសល្យវិច័យយ៉ាងល្អិតល្អន់ក្រែងជាប់ពាក់ព័ន្ធនឹងករណីផ្សេង ប៉ុន្តែពេលពិនិត្យឃើញថាពុំមានស្លាកស្នាមអ្វីទើបប្រគល់សពជូនក្រុមគ្រួសារចាត់ចែងធ្វើបុណ្យតាមប្រពៃណី៕
