ខេត្តរតនគីរី ៖ រថយន្តហ្វតរបស់អង្គការយូណាយធីតវើលស្គូល(united world schools) បើករះបុកបង្គោលគល់ស្ពានស្រែពកថ្មីក្រឡាប់ជាច្រើនត្រឡប់ធ្លាក់ពីលើដងផ្លូវ ជាសំណាងល្អក្នុង១ពាន់គ្រោះថ្នាក់ដែលអ្នកបើកបរនៅមានជីវិត សង្ស័យងងុយដេក ។ ហេតុការណ៍នេះកើតឡើងប្រហែលម៉ោង១រសៀលថ្ងៃទី១៦ខែមករាឆ្នាំ២០១៧ចំណុចគល់ស្ពានស្រែពកថ្មី(ត្រើយខាងកើត)ភូមិ៣ឃុំស្រែអង្គ្រោង ស្រុកកូនមុំ ខេត្តរតនគីរី។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុរថយន្តម៉ាកហ្វតបើកក្នុងល្បឿនមធ្យម ពីលិចទៅកើត (ពីខេត្តស្ទឹងត្រែងចូលមកខេត្តរតនគីរី) ដល់ចំណុចចុះស្ពានរថយន្តថែមល្បឿនរ៉េចង្កូតទៅស្តាំ បណ្តាលឲ្យបុកបង្គោលចំណាំងថ្លាតគល់ស្ពាន ក្រឡាប់ជាច្រើនត្រឡប់ ចូលស្នាមភ្លោះតែម្តង ។ ភ្លាមនោះ អ្នកវើកបរហាក់បីដូចជាសន្លប់ ដូច្នេះពួគគាត់ជាអ្នកឃើញហេតុការណ៍ក៏បានទូរស័ព្ទនគរបាលមកជួយយកមនុស្សចេញដឹកទៅសង្គ្រោះនៅមន្ទីរពេទ្យ។
លោក ហួន ផល្លា នាយប៉ុស្រ៍រដ្ឋបាលស្រែអង្គ្រោងបានឲ្យដឹងថា ជនរងគ្រោះមានឈ្មោះដួង សុភ័ណ្ឌ ភេទប្រុសអាយុ ៣៩ ឆ្នាំ រងរបួសស្រាល របរធ្វើការអង្គការ យូណាយធីតវើលស្គូល(United World Schools) មានទីលំនៅក្រុងបានលុងខេត្តរតនគីរី ។ ចំណែករថយន្តម៉ាក់ហ្វតពាក់ស្លាកលេខភ្នំពេញ 2A I8365 ផ្ទុះប៉ូងខូចខាតស្ទើរទាំងស្រុង។
លោកនាយប៉ុស្តិ៍ស្រែអង្គ្រោងបានបញ្ជាក់ថា ជនរងគ្រោះក្រោយពីយកចេញពីរថយន្តគាត់និយាយបានហើយគាត់ថា គ្រាន់តែបែកមុខបន្តិចបន្តួច ដោយសារមុតកញ្ចក់រថយន្តប៉ុណ្ណោះនេះ ដោយសារដេកលក់១ភ្លេតទើបចាប់ហ្វ្រាំងមិនទាន់ ។ ចំណែករថយន្តខាងអង្គការកំពុងរករថយន្តស្ទូចយកទៅជួសជុលដោយសុំការអនុញាតិពីអធិការស្រុកកូនមុំ ៕
