លោក ជា សត្រា ចាងហ្វាងកាសែត“ខ្មែរថ្មី” (បច្ចុប្បន្នមានជំងឺជាទម្ងន់) ជំងឺលើសឈាមកំពុងសំរាកព្យាបាលស្ថិតក្នុងស្ថានភាពក្រីក្រខ្វះលុយ ខ្វះកាក់ព្យាបាល ។ ប៉ុន្តែលោកត្រូវបានក្លឹបអ្នកកាសែតឯករាជ្យដឹកនាំ ដោយលោកហ៊ុនសុខាបានទៅសួរសុខទុក្ខ ព្រមទាំងឧបត្ថម្ភប្រាក់ចំនួន១០០ដុល្លារអាមេរិក ។
ក្នុងនាមលោក ជា សត្រា ចាងហ្វាងកាសែត“ខ្មែរថ្មី”ដែលជាអ្នកកាសែតម្នាក់ព្រមទាំង ក្រុមគ្រួសារបានថ្លែងអំណរគុណយ៉ាងជ្រាលជ្រៅដល់លោក ហ៊ុន សុខា ប្រធានក្លឹបអ្នកកាសែតឯករាជ្យសូមប្រសិទ្ឋពរដល់ក្លឹបអ្នកកាសែត ឯករាជ្យទទួលនូវជោគជ័យជាបន្តបន្ទាប់ក្នុង តំណាលការក្លឹបរបស់ខ្លួន ។ ជាងនេះទៅទៀត លោក ជា សត្រា ចាងហ្វាងកាសែត“ខ្មែរថ្មី”ក៏សូមលើកដៃអង្វរករដល់មិត្តអ្នកកាសែត ទាំងអស់ជួយដល់រូបលោកផង។
គួរបញ្ជាក់ផងដែរថាលោក ជា សត្រា ចាងហ្វាងកាសែត“ខ្មែរថ្មី”ដែលឥឡូវនេះលោកមានអាយុជិត ៨០ឆ្នាំ ទៅហើយនោះ បានធ្វើការអំពាវនាវយ៉ាងទទូចទៅដល់សប្បុរសជនទាំងអស់ ពិសេសគឺមិត្តភក្តិជាអ្នកកាសែតជំនាន់ មុននិងជំនាន់ ក្រោយ ដើម្បីជួយឧបត្ថម្ភដល់រូបលោកដែលកំពុងរស់នៅយ៉ាងកណ្តោចកណ្តែងបំផុត តែម្នាក់ឯង ។
ថ្លែងប្រាប់សារពត៌មានមុននេះបន្តិចលោក ជា សត្រា បានបញ្ជាក់ថា “ខ្ញុំកំពុងតែ តែលតោល ខ្លាំងណាស់ ក្នុងតំណាក់កាលជីវិតចុងក្រោយនេះ” ។
លោកមានប្រសាសន៍ទាំងទឹកមុខស្ងួតថា “ពេលនេះខ្ញុំគ្មានប្រពន្ធ គ្មានកូន គ្មានទីលំនៅ និងខ្វះខាតសព្វបែបយ៉ាង សូម្បីតែមានជំងឺក៏គ្មានថវិកាសម្រាប់ទិញថ្នាំសង្កូវដែរ” ។
លោក ជា សត្រា បានបន្តថា “សព្វថ្ងៃនេះ ខ្ញុំគ្មានជម្រើសអ្វីក្រៅពីត្រដររស់តាមរបៀបឯកោប៉ុណ្ណោះ ព្រោះខ្ញុំមិនដឹងជាទីពឹងអ្នកណាឡើយ…មានតែសង្ឃឹម លើសប្បុរសជន និងមិត្តភក្តិអ្នកកាសែតជំនាន់មុន និងជំនាន់ក្រោយៗនេះតែម្តង សម្រាប់ឆាកជីវិតចុងក្រោយ” ។
ចាងហ្វាងកាសែត “ខ្មែរថ្មី”ដ៏គួរឲ្យអាណិតរូបនេះ បានលើកដៃសំពះអំពាវនាវយ៉ាងទទូចទៅដល់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ដើម្បីសុំក្តីមេត្តាជួយរូបលោកដែលមានវ័យចាស់ជរាឲ្យចាកផុតពីភាព ទុរគ៌តផង ។ សូមបញ្ជាក់ថា លោក ជា សត្រា គឺជាអ្នកកាសែតជើងចាស់មួយរូបតាំងពីសម័យសង្គមរាស្ត្រនិយមមកម្ល៉េះ ។
ក្រោយការបោះឆ្នោតឆ្នាំ ១៩៩៣ លោក ជា សត្រា បានបង្កើតកាសែតមួយឈ្មោះ “អ្នកនាំសារថ្មី”ព្រមទាំង ជួយបណ្តុះបណ្តាលអ្នកកាសែតថ្មីៗជាច្រើននាក់ថែមទៀត ។ ប៉ុន្មានឆ្នាំមុននេះ លោក ជា សត្រា បានប្តូរឈ្មោះ កាសែតពី “អ្នកនាំសារថ្មី”មកជា“ខ្មែរថ្មី”វិញ ។
លោក ជា សត្រា បានមានប្រសាសន៍ថា “ខ្ញុំសង្ឃឹមថា ព័ត៌មាននេះ នឹងបានជ្រាបទៅដល់ ឯកឧត្តម រដ្ឋមន្ត្រីក្រសួងព័ត៌មាន ហើយឯកឧត្តម ពិតជាជួយខ្ញុំមិនខាន ព្រោះខ្ញុំទ័លច្រកហើយ”។
ប្រសិនបើសប្បុរសជនទាំងក្នុង និងក្រៅប្រទេស ចាប់អារម្មណ៍និងមានបំណងជួយរំលែកទុក្ខវេទនារបស់ លោក ជា សត្រា នោះ សូមទំនាក់ទំនងតាមទូរស័ព្ទលោកផ្ទាល់ ដែលមាន ០១៧ ៥៩៧ ៨៧៧ ៕
