ខេត្តឧត្តរមានជ័យ ៖ ជាក់ស្តែងនៅវេលាម៉ោង ៥រសៀលថ្ងៃ ទី១៧ ខែមករា ឆ្នាំ២០១៥ គេឃើញរថយន្ត ម៉ាកយីឌុបមួយគ្រឿង ពាក់ស្លាកលេខ កំពង់ចាម 3A- 2759 ដែលបានផ្ទុកឈើពេញប្រៀប ធ្វើដំណើរតាមផ្លូវជាតិលេខ PR ១៧៤ ចេញពីស្រុកត្រពាំងប្រាសាទ ឆ្ពោះទៅខេត្តឧត្តមានជ័យ បន្តយកទៅ ចែកចាយ នៅខេត្តបន្ទាយមានជ័យ បានលោក យ៉េន ឆៃ និងលោក ភិន យ៉ាន អះអាងថា គាត់បានរត់ការ បង់លុយឱ្យ សមត្ថកិច្ច និងមន្ត្រីជំនាញ អស់ហើយ។
មានការបញ្ចាក់ផងដែរថា ចាប់តាំងពីថ្ងៃទី០១ ខែមករា ឆ្នាំ២០១៥ រហូតមកទល់ពេលនេះ លោក ភិន យ៉ាន និងលោក យ៉េន ឆៃ បានរត់ការឱ្យ រថយន្តដឹកឈើ៎អត់ច្បាប់ ចេញពីស្រុកត្រពាំងប្រាសាទ ចំនួន៨ គ្រឿង សុទ្ធតែរថយន្តយីឌុបខ្នាតយក្ស ដែលមានប្រវែង ១២ម៉ែត្រ ។
ប្រភពព័ត៌មានឱ្យដឹងថា សកម្មភាពដឹកជញ្ជូនឈើខុសច្បាប់ នៅខេត្តឧត្តរមានជ័យ បានកើតមានជាហូរហែ ដោយសារលោក ភិន យ៉ាន ប្រធានពន្ធនាគារ ខេត្តឧត្តរមានជ័យ និងលោក យ៉េន ឆៃ ជាអ្នកចេញមុខរត់ការ បង់លុយឱ្យសមត្ថកិច្ចនៅតាម ដងផ្លូវ ឡើងសដុះស្លែទៅហើយ ពោលគឺគ្រប់ឡានដឹកឈើខុសច្បាប់ ដែលលោក ភិន យ៉ាន និងលោក យ៉េន ឆៃ ចេញមុខរត់ការ គ្មានសមត្ថកិច្ចណាម្នាក់ ថ្លើមធំហ៊ានប៉ះពាល់ឡើយ។
ផ្ទុយទៅវិញ បើគិតពីបរិមាណឈើវិញ គឺមិនក្រោមពី ៤០០ម៉ែត្រគូបឡើយ ពីព្រោះក្នុងមួយរថយន្ត អាចផ្ទុកបាន ៥០ម៉ែត្រគូបឡើង ហើយសកម្មភាពទាំងអស់នេះ កើតមានជាច្រើនឆ្នាំមកហើយ មិនដែលឃើញ មន្ត្រីជំនាញរដ្ឋបាលព្រៃឈើ បង្ក្រាបឡើយ។ លោក ភិន យ៉ាន ដែលជាប្រធានពន្ធនាគារ ខេត្តឧត្តមានជ័យ បានឱ្យអ្នកយកព័ត៌មានដឹងថា គេបានឱ្យលោករត់ការផ្នែកសមត្ថកិច្ច ដើម្បីយកលុយ មកកសាងអង្គភាព ហើយចំណែកលោក យ៉េន ឆៃ រត់ការផ្នែក ស្ថាប័នសារព័ត៌មាន។
សារព័ត៌មានយើងពុំសុំការទាក់ទងទៅនឹងលោកប្រធានពន្ធនាគារខេត្តឧត្តរមានជ័យបានទេ នៅពេលនេះ ៕
