ដោយកើតទុក្ខមិនសុខចិត្តនៅព្រឹកថ្ងៃទី២២ តុលា ប្រជាពលរដ្ឋទាំង១១គ្រួសារ បានជួបជុំគ្នានៅចំណុចដីមានទំនាស់ ហើយបានសំនូមពរឲ្យប្រព័ន្ឋផ្សព្វផ្សាយ ជួយផ្សាយពីបញ្ហាដែលពួកគាត់កំពុងរងនូវភាពអយុត្តិធម៌នោះ។
ប្រជាពលរដ្ឋទាំង១១គ្រួសារបាននិយាយថា មូលហេតុដែលពួកគាត់នាំគ្នាមកជួបប្រជុំថ្ងៃនេះ ព្រោះតែបានឃើញព័ត៌មានមួយបានចេញផ្សាយកាលពី២១ តុលា ថា ខេត្តបានជួយដោះស្រាយសំណងជូនទៅគ្រួសារប្រជាពលរដ្ឋដែលបានជួបបញ្ហាដីធ្លីនៅជើងភ្នំដោះក្រមុំ ប៉ុន្តែជាការពិតមានអ្នកខ្លះបានទទួលសំណងពិតមែន តែពួកគាត់ចំនួន១១គ្រួសារមិនបានទទួលសំណងសូម្បីមួយកាក់មួយសេនពីអាជ្ញាធរឡើយ។
អ្នកស្រីលី សំនៀង បានឲ្យដឹងថា គាត់បានទៅរស់នៅលើដីនោះតាំងពីឆ្នាំ២០០១ ដោយដីអ្នកស្រីមានទំហំ៣១ម៉ែត្រគុណ៧០ម៉ែត្រ ហើយនៅឆ្នាំ២០១៦ ស្រាប់តែអាជ្ញាធរបានទៅបណ្តេញពួកគាត់ឲ្យចាកចេញពីដីនោះជាបន្ទាន់ ដោយមន្ត្រីអាជ្ញាធរបាននិយាយថា ដីនៅចំនុចជើងភ្នំដោះក្រមុំ ភូមិដោះក្រមុំ សង្កាត់សុខដុម ក្រុងសែនមនោរម្យ នោះជាដីរបស់រដ្ឋ ។
អ្នកស្រីបន្តថា ពួកគាត់ទាំង១១គ្រួសារ មិនយល់ថា ហេតុអីបានជាប្រជាពលរដ្ឋដែលមានកម្មសិទ្ឋនៅចំនុចជើងភ្នំដោះក្រមុំសរុបចំនួន៥៧គ្រួសារ គ្រួសារខ្លះបានទទួលសិទ្ឋស្របច្បាប់ពីអាជ្ញាធរមូលដ្ឋាន ខ្លះបានទទួលសំណងជាថវិកា គ្រួសារខ្លះបានដីកន្លែងផ្សេងជាថ្នូរនិងការដោះដូរ សល់តែគ្រួសាររបស់ពួកគាត់ចំនួន១១គ្រួសារនេះ មិនបានទទួលសំណងនិងគេ។
លោក កែវ សុខុម បានឲ្យដឹងថា គាត់បានទៅរស់នៅខេត្តមណ្ឌលគិរីជាង៣០ឆ្នាំហើយ ចំណែកដីដែលគាត់មាននៅចំនុចជើងភ្នំដោះក្រមុំ គាត់បានទិញពីគេបន្តកាលពីឆ្នាំ២០០៣ ទំហំ៥០ម៉ែត្រ គុណ ៧០ម៉ែត្រ ដោយមានការដឹងឮពីភូមិសង្កាត់។លោកថា នៅឆ្នាំ២០១២ អាជ្ញាធរក្រុងបានឈួសឆាយដីធ្វើឲ្យខូចខាតផលដំណាំ និងផ្ទះសម្បែងរបស់គាត់ ក្រោយធ្វើការឈួសឆាយ គាត់តែងឮថា មានការដោះដូរដីជាសំណង ប៉ុន្តែគាត់មិនបានទទួលដូចគេឡើយ។
ប្រជាពលរដ្ឋទាំង១១គ្រួសារខាងលើ បានស្នើរសល់លោកអភិបាលខេត្តមណ្ឌលគិរី ជួយដោះស្រាយបញ្ហាដីធ្លីជូនពួកគាត់ផង ព្រោះបញ្ហានេះ បានជាប់គាំអស់ពេលជាច្រើនឆ្នាំមកហើយ តាំងពីជំនាន់លោកអភិបាលខេត្តចាស់ លោក ចាន់ យឿន និងតមកលោក អេង ប៊ុនហ៊ាង ឥឡូវដល់ជំនាន់លោកស្វាយ សំអ៊ាង ហើយសូមជួយដោះស្រាយឲ្យបានចប់ផង។
ក្នុងឯកសារក្នុងកិច្ចប្រជុំកាលពីថ្ងៃទី៥ តុលា ២០១៦ លោកស្វាយ សំអ៊ាង អភិបាលខេត្តមណ្ឌលគិរីបានថា ចំពោះបញ្ហាប្រជាពលរដ្ឋចំនួន១១គ្រួសារ ដែលមានការប៉ះពាល់ អាជ្ញាធរខេត្តក៏និងស្នើរសុំដល់ក្រុមការងារក្រសួង ដើម្បីកាត់ចេញនិងផ្តល់ជូនប្រជាពលរដ្ឋផងដែរ ដោយក្នុងមួយគ្រួសារស្នើរសុំផ្តល់ជូន៥ម៉ែត្រ គុណ៣០ម៉ែត្រ ដោយត្រូវគិតចាប់ពីទីតាំង ដែលបានស្នើរសុំផ្តល់ជូនសម្រាប់សាសង់ស្ថានីយ៏ផ្គត់ផ្គង់ទឹកស្អាត។
ពាក់ព័ន្ឋបញ្ហាដីនៅភ្នំដោះក្រមុំនេះ កាលពីឆ្នាំ២០០៣ លោកខូយ ឃុនហួរ អតីតអភិបាលរងខេត្តបានស្នើរសុំរក្សាដីនេះទុកសម្រាប់បងប្អូនជនជាតិដើមភាគតិច ប៉ុន្តែមិនបានបញ្ជាក់ពីទំហំច្បាស់លាស់នោះទេ។ម្យ៉ាងវិញទៀត ចំពោះសេចក្តីជូនដំណឹងរបស់ទីស្តីការគណៈរដ្ឋមន្ត្រី ក៏មិនបានបញ្ជាក់អំពីទំហំឲ្យបានច្បាស់លាស់ផងដែរ។បញ្ហានេះធ្វើឲ្យយើងទាំងអស់គ្នាមានការលំបាកក្នុងការដោះស្រាយ ព្រោះថា បញ្ហាមានការស្មុគស្មាញ និងប្រទាក់ក្រឡាគ្នា ដែលកន្លងមកតាមដែលខេត្តបានដឹង ផ្ទៃដីសរុបតំបន់ភ្នំដោះក្រមុំនេះ មានចំនួន១០៣ហិចតា ប៉ុន្តែក្រោយមកនៅសល់តែ៨៧ហិចតា។
លោកសី ទូច ប្រធានមន្ទីរវប្បធម៌ និងវិចិត្រសិល្បះបានបន្តថា ផ្ទៃដីទីតាំងភ្នំដោះក្រមុំ ដែលស្ថិតនៅភូមិដោះក្រមុំ សង្កាត់សុខដុម ក្រុងសែនមនោរម្យ មានទំហំសរុប១០៣ហិចតា ដោយរាប់បញ្ចូលទាំងទីតាំងសំណង់ផ្សេងៗដែលបានសាងសង់នៅជើងភ្នំផងដែរ។ប៉ុន្តែរហូតដល់បច្ចុប្បន្ននេះ ដីនៅសល់ចំនួនត្រឹមតែ៨៧ហិចតា ប៉ុណ្ណោះ ដោយកាត់ផ្ទៃដីពាក់ព័ន្ឋចេញអស់ លើកលែងតែផ្ទៃដីស្នើរសុំទុកសម្រាប់សាងសង់អគាររដ្ឋបាលចំនួន៣អង្គភាព៕
