ខេត្តបាត់ដំបង ៖ កាលពីព្រឹកថ្ងៃទី ២០ ខែតុលា ឆ្នាំ២០១៦ សត្វអណ្តើករស់ចំនួន ជិត ១០០ក្បាល ដែលប៉ូលិសស្នងការដ្ឋាន ខេត្ត ចុះល្បាតប្រទះឃើញនៅភូមិ-ឃុំជ្រៃ ស្រុកថ្មគោល ត្រូវបានបង្កើតគណៈកម្មការមួយ យកសត្វអណ្តើករស់ទាំងនោះ ទៅព្រលែងនៅក្នុងស្រះទឹកបុរាណ មុខប្រាសាទបាណន់ ដែលមានការចូលរួមពីលោក នួន សាន ព្រះរាជអាជ្ញា អមសាលាដំបូងខេត្ត, លោកវរសេនីយ៍ឯក ម៉ៅ រង្សី នាយការិយាល័យប្រឆាំងបទល្មើសសេដ្ឋកិច្ច និងលោកវរសេនីយ៍ឯក កុយ ហៀង ស្នងការរងខេត្តទទួលផែនប្រឆាំងបទល្មើស ព្រមទាំងកម្លាំងនគរបាលមួយចំនួន ។
លោកវរសេនីយ៍ឯក ម៉ៅ រង្សី នាយការិយាល័យប្រឆាំងបទល្មើសសេដ្ឋកិច្ចបានឱ្យដឹងថា កាលពីថ្ងៃទី ២០ ខែតុលា កម្លាំងក្រុមបង្កាបង្ក្រាបនៃស្នងការដ្ឋានខេត្តបានចេញប្រតិបត្តិការតាមដងផ្លូវ បានជួបប្រទះឃើញកេសក្រដាសចំនួន ៣ ដាក់នៅក្បែរផ្លូវគ្មានម្ចាស់ ។ ដោយមានការសង្ស័យសមត្ថកិច្ចក៏ឆែកឆេរមើលឃើញសុទ្ធតែសត្វអណ្តើករស់ចំនួន ៩៣ក្បាល ។ បន្ទាប់មកទៀត កម្លាំងចុះល្បាតក៏បានរាយការណ៍ជូនលោកស្នងការដ្ឋានខេត្ត និងសុំយោបល់ពីលោក នួន សាន ព្រះរាជអាជ្ញា ហើយបានឯកភាពយកទៅលែងនៅក្នុងស្រះទឹកបុរាណនៅមុខប្រាសាទបាណន់ ។
ចំណែកលោក នួន សាន ព្រះរាជអាជ្ញាបានស្នើឱ្យមន្ត្រីនគរបាលទាំងអស់ខិតខំស្វែងរកអត្តសញ្ញាណអ្នករកស៊ីជួញដូរ សត្វព្រៃខុសច្បាប់យកមកផ្តន្ទាទោស ដែលកន្លងមកកម្លាំងយើងធ្លាប់រកឃើញ ២ករណីមកហើយ ។
ដោយឡែកលោក កុយ ហៀង ស្នងការរងខេត្តបានប្តេជ្ញាចិត្តថា នឹងស្រាវជ្រាវរកមុខសញ្ញាជួញដូរសត្វព្រៃឱ្យទាល់ តែឃើញ ។ លោកបានបន្តទៀតថា កម្លាំងសមត្ថកិច្ចយើងរកឃើញសត្វអណ្តើកលើកនេះ ក៏ដូចជា លើកមុនៗដែរ គឺជនសង្ស័យមានគោលបំណងដឹកជញ្ជូនសត្វ ទាំងនេះ យកទៅលក់នៅខេត្តផ្សេងៗ ឬក៏យកទៅលក់នៅប្រទេសវៀតណាមផងដែរ ។
លោកវរសេនីយ៍ឯក ម៉ៅ រង្សី បានបញ្ជាក់បន្ថែមទៀតថា នៅក្នុងពិធីព្រលែងសត្វអណ្តើកនេះ មានវត្តមានលោក នួន សាន ព្រះរាជអាជ្ញាអមសាលាដំបូងខេត្ត លោក ឈឹម វជិរា ប្រធានមន្ទីរកសិកម្ម លោកវរសេនីយ៍ឯក កុយ ហៀង ស្នងការ រងខេត្ត ទទួលផែនប្រឆាំងបទល្មើស និងមន្ត្រីនគរបាលមួយចំនួនថែមទៀតផង ។ លោកបន្តទៀតថា ការរកឃើញសត្វអណ្តើកចំនួន ៣កេសនេះ គឺម្ចាស់បានដឹងខ្លួនមុនរត់គេចខ្លួនបាត់ ប៉ុន្តែមន្ត្រីជំនាញកំពុងធ្វើការស្រាវជ្រាវតាម រកមុខសញ្ញាជួញដូរសត្វព្រៃខុសច្បាប់បន្តទៀត និងចាប់អ្នករកស៊ីជួញដូរសត្វព្រៃនោះឱ្យបាន នឹងផ្តន្ទាទោសតាមច្បាប់ ៕
