មណ្ឌលគិរី ៖ ឈើជាច្រើនដុំទៀតហើយគរទុកចោលនៅលើដីរបស់ប្រជាពលរដ្ឋ នៅក្បែរផ្លូវទៅច្រកទ្វារឡាប៉ាខេ នៅចំនុចជញ្ជីងទីមួយស្ថិតនៅក្នុងភូមិឡាប៉ាខេ ឃុំស្រែខ្ទុម ស្រុកកែវសីមា ត្រូវបានសមត្ថកិច្ច និងជំនាញ រឹបអូសយកលមករក្សាទុកនៅផ្នែករដ្ឋបាលព្រៃឈើរស្រុកកែវសីមា ដោយមិនដឹងក្រុមឈ្មួញណាទេដែលបានយកឈើមកគរទុក សម្រាប់លួចដឹកជញ្ជូនយកទៅលកឲ្យឈ្នួញវៀតណាម ប៉ុន្តែត្រូវបានជំនាញផ្នែករដ្ឋបាលព្រៃឈើស្រុកកែវសីមា សហការណ៍ជាមួយនគរបាលអធិការស្រុកចុះរឹបអូស កាលពីព្រឹកថ្ងៃទី១៤ខែតុលាឆ្នាំនេះ ។
បើតាមពលរដ្ឋរស់នៅម្តុំនោះបានប្រាបឲ្យដឹងថា ពួកឈ្មួញនៅក្នុងស្រុកនេះ នៅតែធ្វើសកម្មភាពលួចដឹកជញ្ជូនឈើ ទោះបីសមត្ថកិច្ច និងជំនាញចុះបង្ក្រាបបានជាបន្តបន្ទាប់នាពេលកន្លងមក។
ពលរដ្ឋបានបន្តថា រយះពេលមួយខែនេះ ការចុះបង្ក្រាបរបស់ជំនាញសមត្ថកិច្ច និងកងរាជអាវុធហត្ថលើផ្ទៃប្រទេស បានទាំងរថយន្តដឹកឈើ ព្រមទាំងជនសង្ស័យ បញ្ជូនមកសាលាដំបូងខេត្តចាត់ទៅតាមនិតិវិធីនៃច្បាប់ ធ្វើឲ្យក្រុមឈ្មួញមួយចំនួនខ្លាចរអា ប៉ុន្តែក៏នៅមានក្រុមឈ្មួញមួយចំនួនតូចនៅតែហ៊ានលួចធ្វើសកម្មភាព ជាក់ស្តែងឈើដែលគរទុកខាងលើជាដើម។
ពលរដ្ឋបានបន្តទៀតថា បើចង់រកមុខក្រុមឈ្មួញនេះ ត្រូវរកម្ចាស់ផ្ទះមកសួរនាំនឹងដឹងហើយឈើរបស់អ្នកណានោះ ។
លោក ជុយ សុខឃាង នាយផ្នែករដ្ឋបាលព្រៃឈើស្រុកកែវសីមាបានប្រាប់ឲ្យដឹងថាក្នុងប្រតិបត្តិការណ៍ត្រួតពិនិត្យនឹងឆែកឆេរនៅលើដីខាងលើនេះកំលាំងរបស់លោករឹបអូសបានឈើចំនួន ២០ ដុំ ប្រភេទឈើសុក្រំ បើគិតជាម៉ែត្រគូបមិនទាន់ដឹងនៅឡើយទេ ពីព្រោះមិនទាន់ធ្វើការវាស់វែង។
លោកបានបន្តថា ក្នុងប្រតិបត្តិការណ៍ឆែកឆេរនឹងរឹបអូសខាងលើនេះគឺធ្វើឡើងដោយមានការអនុញ្ញាតិនឹងបញ្ជាផ្ទាល់ពីលោក សូ សុវិជ្ជា ព្រះរាជអាជ្ញារងអមសាលាដំបូងខេត្តមណ្ឌលគីរី ឲ្យចុះប្រមូលយកវត្ថុតាងទាំងអស់យកទៅរក្សារទុកនូវផ្នែករដ្ឋបាលព្រៃឈើស្រុកកែវសីមា នឹងស៊ើបសួររកម្ចាស់ ដើម្បីចាត់ការទៅតាមនិតិវិធីច្បាប់ ៕
