ព្រះអង្គបានសោយទិវង្គតនៅក្នុងមន្ទីរពេទ្យស៊ីរីរ៉ានាថ្ងៃព្រហស្បតិ៍ ទី១៣ តុលាក្នុងព្រះជន្ម ៨៨ព្រះវស្សា។ លោកនាយករដ្ឋមន្ត្រីថៃប្រាយុទ្ធ ចាន់អូចាបានប្រកាសឲ្យដឹងភ្លាមៗថា ពិធីកាន់ទុក្ខព្រះបរមសពព្រះចៅភូមិបុលនឹងត្រូវធ្វើរយៈពេល ១ឆ្នាំ ហើយរាល់កម្មវីធីផ្សេងៗនឹងត្រូវកាត់បន្ថយរយៈពេល ១ខែ។ ទន្ទឹមគ្នានេះ លោកចាន់អូចាក៏បានប្រាប់ឲ្យដឹងថា រាជទាយាទម៉ាហា វិជ្ជរ៉ាឡុងកននឹងឡើងសោយរាជ្យជាមហាក្សត្រថ្មី។
ដំណឹងសោយទិវង្គតព្រះចៅភូមិបុល អាប់ឌុលយ៉ាដេតក្នុងមន្ទីរពេទ្យស៊ីរីរ៉ាត្រូវបានប្រកាសដោយព្រះបរមរាជវាំងតាមរយៈសេចក្តីជូនដំណឹងមួយ។ ភ្លាមៗនោះ គ្រប់កាណាល់ទូរទស្សន៍ក្នុងស្រុកទាំងអស់ក៏បានផ្អាកកម្មវិធីផ្សាយធម្មតារបស់ខ្លួនដោយបង្ហាញលើអេក្រង់ជាពណ៌ប្រផះ។ ចំណែកប្រជារាស្ត្រថៃជាច្រើនរាប់រយនាក់មានកាន់ទង់រាជានិយមពណ៌ផ្កាឈូក និងលឿងដែលបាននាំគ្នាទៅបន់ស្រន់នៅក្នុង និងក្រៅបរិវេណមន្ទីរពេទ្យស៊ីរីរ៉ាក៏បាននាំគ្នាលុតជង្គង់ ក្រាបទ្រហោយំគ្រប់ៗគ្នា។
សូមជម្រាបជូនថា មានព្រះជន្ម ៨៨ព្រះវស្សា ព្រះចៅភូមិបុលត្រូវបានប្រជារាស្ត្រថៃទូទៅគោរពដូចជាព្រះអាទិទេព។ ព្រះអង្គបានឡើងសោយរាជ្យក្នុងឆ្នាំ ១៩៤៦ បន្ទាប់ពីការសោយទិវង្គតយ៉ាងអាថ៌កំបាំងរបស់បងប្រុសព្រះអង្គ ហើយតាំងពីពេលនោះមក ប្រជារាស្ត្រថៃមិនដែលធ្លាប់ស្គាល់មហាក្សត្រអង្គណាផ្សេងទេ។ តាំងពី២ឆ្នាំកន្លងទៅនេះ ព្រះចៅភូមិបុលដែលមានជម្ងឺរលាតសួត និងទឹកក្នុងខួរក្បាលបានសម្រាកព្យាបាលក្នុងមន្ទីរជាប្រចាំ និងដែលជិត ១ឆ្នាំកន្លងទៅ ព្រះអង្គមិនដែលបានបង្ហាញព្រះភក្ត្រជាសាធារណៈទេ។
លោកនាយករដ្ឋមន្ត្រីប្រាយុទ្ធ ចាន់អូចាបានប្រកាសឲ្យដឹងភ្លាមៗក្នុងថ្ងៃសោយទិវង្គតព្រះចៅភូមិបុលថា ការកាន់ទុក្ខព្រះបរមសពនឹងត្រូវធ្វើក្នុងរយៈពេល ១ឆ្នាំ ហើយគ្រប់កម្មវិធីផ្សេងៗជាសាធារណៈនឹងត្រូវកាត់បន្ថយរយៈពេល ១ខែ។ ទន្ទឹមគ្នានេះ លោកប្រាយុទ្ធ ចាន់អូចាក៏បានប្រាប់ឲ្យដឹងថា រាជទាយាទម៉ាហា វិជ្ជរ៉ាឡុងកនដែលមានព្រះជន្ម ៦៤ព្រះវស្សានឹងឡើងសោយរាជ្យជាមហាក្សត្រថ្មី។ សូមជម្រាបជូនថាមកទល់សព្វថ្ងៃនេះ រាជទាយាទម៉ាហា វិជ្ជរ៉ាឡុងកនបានគង់នៅក្នុងទឹកដីអាល្លឺម៉ង់ច្រើនជាងក្នុងទឹកដីថៃ។
នៅក្នុងប្រទេសថៃ ក្រុមគ្រួសាររាជវង្សត្រូវបានការពារដោយច្បាប់យ៉ាងតឹងរឹងជាទីបំផុតមួយក្នុងលោក។ រាល់ទង្វើទាំងឡាយណាដែលមានលក្ខណៈប្រមាថ ឬដៀមដាមលើក្រុមគ្រួសាររាជវង្សអាចនឹងដេកក្នុងគុកដល់ទៅ ១៥ឆ្នាំ។ អ្វីជាការកត់សម្គាល់ ការសោយរាជ្យរយៈពេល ១០ឆ្នាំចុងក្រោយរបស់ព្រះចៅភូមិបុលបានពើបប្រទះនឹងវិបត្តិនយោបាយហែកហួរផ្ទៃក្នុងយ៉ាងជ្រៅរវាងក្រុមអាវលឿង និងក្រុមអាវក្រហម។ វិបត្តិដែលត្រូវបានគេមើលឃើញគ្មានទីបញ្ចប់ជាមួយនឹងមហាក្សត្រថ្មីដែលមិនសូវមានប្រជាប្រិយភាពដូចព្រះបិតា និងដែលប្រជារាស្ត្រថៃមិនសូវស្គាល់៕
