នៅព្រឹកថ្ងៃទី១០ ខែតុលា ឆ្នាំ២០១៦ ឯកឧត្តម នាយឧត្តមសេនីយ៍ អ៊ី ឈាន រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់ជាតិចុះមូលដ្ឋានខេត្តប៉ៃលិន បានអញ្ជើញជួបសួរសុខទុក្ខ និងផ្តល់អត្តសញ្ញាណប័ណ្ណសញ្ជាតិខ្មែរ ដល់គេហដ្ឋានប្រជាពលរដ្ឋជនបទចំនួន២០០នាក់ ក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ក្នុងឱកាសនោះឯកឧត្តម បានធ្វើការសួរសុខទុក្ខ និងអំពាវនាវឲ្យប្រជាពលរដ្ឋទាំងអស់ដែលទទួលបានអត្តសញ្ញាណប័ណ្ណសញ្ជាតិខ្មែរថ្មីនាពេលនេះ ឲ្យអញ្ជើញទៅចុះឈ្មោះបោះឆ្នោតឆ្នាំ២០១៦នេះ ឲ្យបានគ្រប់ៗគ្នា ដើម្បីបំពេញកាព្វកិច្ចជាពលរដ្ឋល្អ និងដើម្បីចូលរួមធ្វើការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ ក្នុងឆ្នាំ២០១៧ ខាងមុខនេះ ។ ឯកឧត្តមក៏បានគូសបញ្ជាក់ផងដែរ សូមឲ្យប្រជាពលរដ្ឋទាំងអស់ក្នុងខេត្ត ធ្វើការបោះឆ្នោតជូន គណបក្សប្រជាជនកម្ពុជា ដើម្បីបន្តដឹកនាំ ថែរក្សាការពារសុខសន្តិភាព ស្ថេរភាព សន្តិភាព និងការអភិវឌ្ឍប្រទេសប្រកបដោយចេរភាព សម្រាប់ទុកជូនកូនចៅជំនាន់ក្រោយៗទៀត និងសូមកុំឲ្យចាញ់បោកអ្នកនយោបាយដែលតែងតែដើរឃោសនាបោកប្រាស់ ដែលមិនអាចធ្វើបាន និងមិនដែលបានធ្វើអ្វីជូនប្រជាពលរដ្ឋ និងប្រទេសជាតិ ពិតប្រាកដ ។
ឆ្លៀតក្នុងឱកាសចុះជួបប្រជាពលរដ្ឋដល់មូលដ្ឋានឯកឧត្តម អ៊ី ឈាន បានចូលរួមរំលែកទុក្ខចំពោះគ្រួសារសពលោក ចាន់ ច្រឹប ដែលជាអតីយុទ្ធជនតស៊ូសម័យសង្គ្រាមលំបាកជាមួយគ្នានាពេលកន្លងមក និងបានផ្តល់ប្រាក់មរណៈសង្គ្រោះរបស់សមាគមអតីតយុទ្ធជនកម្ពុជា ចំនួន ៤លានរៀល រួមនឹងថវិកាលោកជំទាវ អ្នកតំណាងរាស្ត្រគណបក្សប្រជាជនកម្ពុជាមណ្ឌលប៉ៃលិន ចំនួន ១លានរៀលបន្ថែម ជូនគ្រួសារសព សម្រាប់ដោះស្រាយការលំបាកនាពេលនេះ ផងដែរ ។
សូមបញ្ជាក់ថា ប្រជាពលរដ្ឋទាំង២០០នាក់ ដែលទទួលបានអត្តសញ្ញាណប័ណ្ណសញ្ជាតិខ្មែរថ្មីនាពេលនេះ កន្លងមក ឯកឧត្តម នាយឧត្តមនីយ៍ អ៊ី ឈាន បានរៀបចំក្រុមការងារ សហការជាមួយជំនាញ នៃស្នងការនគរបាលខេត្តប៉ៃលិន ចុះចល័តធ្វើជូនប្រជាពលរដ្ឋដោយឥតគិតថ្លៃ ដោយឯកឧត្តម និងលោកជំទាវ បាន ស្រីមុំ អ្នកតំណាងរាស្ត្រ គណបក្សប្រជាជនកម្ពុជា មណ្ឌលប៉ៃលិន បងថ្លៃសេវាធ្វើអត្តសញ្ញាណប័ណ្ណសញ្ជាតិខ្មែរ ជូនទាំងស្រុង ៕
