ខេត្តប៉ៃលិន ៖ មានហេតុការណ៍ បុរសក្រីក្រម្នាក់ បាននាំអ្នកភូមិចំនួន៥ទៅ៦នាក់ដើរឡើងទៅរកជីកទំពាំងឫស្សីនៅលើកូនភ្នំមួយក្បែរភូមិ ដែលមានចម្ងាយពីផ្ទះជាង២គីឡូម៉ែត្រ ស្រាប់តែជាន់លើមីនស្មាច់ ដែលសេសសល់ពីសម័យសង្គ្រាម បណ្តាលឱ្យផ្ទុះយ៉ាងកក្រើក ដាច់ជើងស្តាំតែម្តង ។ ភ្លាមៗនោះ ត្រូវបានអ្នករួមដំណើរទៅជាមួយ ឃើញទាន់ ក៏ប្រញាប់សែងយកទៅក្នុងភូមិ ដើម្បីបញ្ជូនបន្តទៅសង្គ្រោះនៅមន្ទីរពេទ្យបង្អែកខេត្ត ត្រូវគ្រូពេទ្យធ្វើការវះកាត់ផងដែរ ។
ហេតុការណ៍នេះ បានកើតឡើងកាលពីវេលាម៉ោង៧ និង០០នាទី ព្រឹកថ្ងៃទី១១ ខែតុលា ឆ្នាំ២០១៦ ស្ថិតនៅចំណុចភ្នំទ្រុងមាន់ ទ្រុងទា ក្នុងភូមិបុស្អំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីលោក ជុំ វឿន នាយប៉ុស្តិ៍នគរបាល ឃុំស្ទឹងកាច់ បានឲ្យដឹងថា ជនរងគ្រោះមាន ឈ្មោះ គឹម ភឿន ភេទប្រុស អាយុ៤៦ឆ្នាំ មានប្រពន្ធ ឈ្មោះ ទូច នាង អាយុ៤០ឆ្មាំ ជាកសិករ រស់នៅភូមិ ឃុំខាងលើ ។ លោកបានបន្តទៀតថា ដោយសារតែជីវភាពខ្វះខាត ទើបជនរងគ្រោះបានបបួលអ្នកភូមិជាមួយគ្នាប្រហែល៥ ទៅ៦នាក់ មានក្មេងចាស់ ប្រុសស្រី បានដើរឡើងទៅលើភ្នំ ដើម្បីរកជីកទំពាំងឫស្សីនៅភូមិសាស្ត្រខាងលើ ដែលជាតំបន់មិនទាន់បានរាវរកមីននៅឡើយ ក៏ជាន់មីនប្រភេទមីនស្មាច់ផលិតនៅប្រទេសសូវៀត បណ្តាលឲ្យដាច់ជើងខាងស្តាំរងរបួសធ្ងន់តែម្តង ។ បច្ចុប្បន្នជនរងគ្រោះ កំពុងត្រូវបានស ង្គ្រោះបន្ទាន់នៅមន្ទីរពេទ្យបង្អែកខេត្តប៉ៃលិន ។
ចំណែកប្រជាពលរដ្ឋដែលរួមដំណើរទៅជាមួយ បានឱ្យដឹងថា នៅតំបន់ខាងលើ ត្រូវបានក្រុមដោះមីនរបស់មន្ត្រីយោធាមួយក្រុម(អិនភីមិច) បានដាក់ផ្លាកដោះគ្រាប់មីននៅ ទីនោះរួចរាល់អស់ហើយ ទើបមានប្រជាពលរដ្ឋជាច្រើននាំគ្នាទៅកាប់ចម្ការដាំពោត និងដំ ឡូងមី ហើយនៅកន្លែងខ្លះទៀត មានឫស្សីដុះទ្រុបទ្រុល ទើបនឹងលាស់ថ្មី ពួកគេក៏ចូលទៅ ជីកដើម្បីលក់យកប្រាក់ទិញអង្ករទទួលទាន ។ ពួកគេបញ្ជាក់ទៀតថា ប្រជាពលរដ្ឋបានឡើ ងទៅលើភ្នំនេះ ដើម្បីជីកទំពាំងអស់រយៈពេលជាច្រើនថ្ងៃមកហើយ ដោយឡែកតែជនរង គ្រោះទើបនឹងទៅមួយថ្ងៃក៏ជាន់លើគ្រាប់មីនផ្ទះរបួសដាច់ជើងស្តាំតែម្តង ។
សូមបញ្ជាក់ថា ករណីផ្ទុះមីនរបួសដាច់ជើងមានចំនួន៣ករណីមកហើយក្នុងខេត្តប៉ៃ លិន នៅឆ្នាំ២០១៦នេះ ដូច្នេះសូមឱ្យបងប្អូនប្រជាពលរដ្ឋទាំងអស់ ជាពិសេសអ្នកចម្ការ ត្រូវមានការប្រុងប្រយ័ត្នខ្ពស់ ក្នុងការរុកព្រៃរកទំពាំង រកផ្សិត បេះផ្លែឈើ ឬរកសត្វព្រៃជា ដើម ៕ ដោយ ៖ នីយ៉ា
