សេចក្តីរាយការណ៏បានឲ្យដឹងថា កាលពីល្ងាចថ្ងៃទី៦ តុលា ២០១៦ ចំនុចផ្លូវចំណោតអូររមីស ក្នុងភូមិពូតាំង សង្កាត់រម្យនាក្រុងសែមនោរម្យ រថយន្តខ្នាតយក្ស(យីឌុប)ចំនួន៤គ្រឿង ត្រូវបានប៉ូលិសសេដ្ឋកិច្ចក្រសួងមហាផ្ទៃ ចាប់ឃាត់បានរយៈពេលប្រមាណ៣ម៉ោង សង្ស័យដឹកឈើខុសច្បាប់ តែក៏ដោះលែងវិញនៅថ្ងៃដដែល ដោយមិនមានមន្ត្រីជំនាញណាអះអាងថា មានច្បាប់ឬអត់ច្បាប់នោះទេ។
ប្រភពបានឲ្យដឹងថា ក្បួនរថយន្តយីឌុបនោះគឺរបស់លោកឧកញ៉ា វីដា ដែលបានដឹកឈើចេញពីស្រុកកោះញែក តែមិនដឹងថា ដឹកយកទៅណាឲ្យប្រាកដទេ ។ ការដឹកជញ្ជូនឈើចេញពីស្រុកកោះញែក ត្រូវបានគេដឹងថា មានសកម្មភាពប្រមាណ១សប្តាហ៏រួចមកហើយ ខណៈមន្ត្រីជំនាញព្រៃឈើនិយាយថា ឈើទាំងនោះគេមានច្បាប់ត្រឹមត្រូវ។
អ្នកយកព័ត៌មានមិនអាចសុំការបំភ្លឺពីលោកឧកញ៉ា វីដា ឬអ្នកតំណាងរបស់លោកបានទេ នៅរសៀលថ្ងៃទី៧ តុលា ។ ចំណែកសមត្ថកិច្ចពាក់ព័ន្ឋនានាក៏មិនអាចសុំការបំភ្លឺបានដែរ ប្រហែលត្រូវដងត្រូវផ្លែអស់ទៅហើយ។
ប្រជាសហគមន៏នៅស្រុកកោះញែកបាននិយាយថា មុនពេលមានសកម្មភាពដឹកឈើតាមរថយន្តយីឌុបរបស់លោកឧកញ៉ា គេបានឃើញក្រុមឈ្មួញជាច្រើនបានសម្រុកដឹកឈើចេញពីព្រៃអភិរក្ស និងព្រៃការពារយកទៅទម្លាក់ ក្នុងឃ្លាំមួយកន្លែងដែលហ៊ុំព័ទ្ឋទៅដោយរបងបិតស័ង្កសីពណ័ខៀវ ។
ប្រជាសហគមន៏បានដាក់ការសង្ស័យថា ការដឹកជញ្ជូនឈើតាមរយៈរថយន្តយីឌុបទាំងនោះ អាចមានភាពមិនប្រក្រតី ព្រោះតាំងពីមួយឆ្នាំមុន គេឮតែឧកញ៉ា វីដា ព្យាយាមរត់ការសុំជំនាញនិងសមត្ថកិច្ចជាច្រើនស្ថាប័ន ដើម្បីបានដឹកឈើចេញពីស្រុកកោះញែក តែត្រូវបរាជ័យព្រោះ មានយុទ្ឋការបង្ក្រាបការរត់ពន្ឋឈើទូទាំងប្រទេស ទើបធ្វើឲ្យដំណើរការដឹកជញ្ជូនឈើរបស់លោកឧកញ៉ាម្នាក់នោះ ត្រូវអាក់ខាន រហូតមកដល់ពេលនេះ ទើបឃើញមានការដឹកជញ្ជូនឡើងវិញ។
មហាជនបានសំនូមពរដល់អាជ្ញាធរខេត្ត ត្រូវចាត់វិធានការការដឹកជញ្ជូនឈើទាំងនោះផង បើសិនជាឈើទាំងនោះពិតជាបានបង់ពន្ឋចូលរដ្ឋពិតមែនក៏គួរសាលាខេត្តមណ្ឌលគិរីចេញសេចក្តីជូនដំណឹងដល់ប្រជាពលរដ្ឋឲ្យបានជ្រាប ព្រោះសព្វថ្ងៃប្រព័ន្ឋផ្សព្វផ្សាយមានច្រើនមិនពិបាកនោះទេ ឬមួយថា ឈើទាំងនោះពិតជាខុសច្បាប់ដូចគេថា មែន ?៕
