ខេត្តប៉ៃលិន ៖ មន្ត្រីនគរបាលសេដ្ឋកិច្ចនៃស្នងការខេត្តប៉ៃលិន បានស្ទាក់ចាប់រថយន្តដឹកទឹកកកអនាម័យ ១គ្រឿង ដែលកំពុងបើកបរចូលមកដាក់លក់នៅក្នុងខេត្តប៉ៃលិន ខណៈម្ចាស់អាជីវកម្មអះអាងថា មានច្បាប់ចេញពីក្រសួងពាណិជ្ជកម្ម ថែមទាំងមានលិខិតបញ្ជាក់ការដាក់ទីតាំងលក់ដូរ ចេញពីមន្ទីរពាណិជ្ជកម្មខេត្តប៉ៃលិនថែមទៀតផង ។ តែខាងស្នងការនគ របាលខេត្តប៉ៃលិន បានអះអាងថា នេះជាបញ្ជាពីអាជ្ញាធរខេត្តឱ្យនគរបាលសេដ្ឋកិច្ច ចុះទៅចាប់ឃាត់រថយន្តព្រោះគេបានធ្វើកិច្ចសន្យាមិនឱ្យបន្តដឹកមកលក់ដូរនៅខេត្តប៉ៃលិនទៀតលុះអត់ធ្វើតាមក៏ឃាត់រថយន្តទុកតែម្តង ។
ហេតុការណ៍នេះ បានកើតឡើងកាលពីវេលាម៉ោង១០និង១៧នាទីយប់ថ្ងៃទី១៧ ខែកញ្ញា ឆ្នាំ២០១៦ ស្ថិតនៅបណ្តោយផ្លូវជាតិលេខ៥៧ ក្នុងភូមិដីក្រហម សង្កាត់អូរតាវ៉ៅ ក្រុងប៉ៃលិន ។
ប្រភពព័ត៌មានបានឱ្យដឹងថា អ្នកបើកបររថយន្តដឹកទឹកកកអនាម័យពីខេត្តបាត់ដំបងចូលមកលក់ដូរនៅក្នុងខេត្តប៉ៃលិន ឈ្មោះ គឹម ចន ភេទប្រុស អាយុ៣២ឆ្នាំ មានស្រុកកំណើតរ ស់នៅភូមិចាយ៉ូវ ឃុំមេទឹក ស្រុកបាកាន ខេត្តពោធិ៍សាត់ ។ ចំណែកអ្នករត់ច្បាប់ដឹកទឹកកកអនាម័យ ឈ្មោះ ឈីវ វ៉ានសែត ភេទប្រុស អាយុ៦០ឆ្នាំ ដាក់ទីតាំងនៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ។
ប្រភពព័តមានពីលោក ឈីវ វ៉ាន់សែត បានឱ្យដឹងថា ការប្រកបមុខរបរដឹកទឹកកកអនាម័យយកមកលក់ដូរនៅក្នុងទឹកដីខេត្តប៉ៃលិន ពិតជាមានការលំបាកខ្លាំងណាស់ បើទោះបីជាខាងលោកមានច្បាប់ចេញពីក្រសួងពាណិជ្ជកម្មហើយក៏ដោយ ដោយមានអ្នកលក់ទឹកកកកអនាម័យដូចគ្នា នៅក្នុងមូលដ្ឋានជាអ្នកប្តឹងខាងលោក ព្រោះទឹកកកអនាម័យរបស់លោកល្អជាងគេ លុះគេលក់ប្រកួតប្រជែងមិនឈ្នះ ទើបប្តឹងនគរបាលឱ្យធ្វើបាបលោកបែបនេះ ។
លោកបន្តទៀតថា នៅយប់ថ្ងៃកើតហេតុ ខណៈកម្មករកំពុងបើកបររថយន្តដឹកការ៉ុងទឹកកកអានាម័យចំនួន១០០ការ៉ុង ដោយទឹកកកអនាម័យដុំធំ ចំនួន៤០ការ៉ុង ក្នុង១ការ៉ុងទម្ងន់២០គីឡូក្រាម និងទឹកកកអនាម័យដុំតូច ចំនួន៦០ការ៉ុង ក្នុង១ការ៉ុង ទម្ងន់២០គីឡូក្រាមដូចគ្នា ត្រូវនគរបាលសេដ្ឋកិច្ចនៃស្នងការនគរបាលខេត្តប៉ៃលិន ចាប់ឃាត់យកទៅរក្សាទុកនៅក្នុងស្នងការដ្ឋាននគ របាលខេត្តតែម្តង ។
លោកបញ្ជាក់ទៀតថា ការដឹកទឹកកកអនាម័យលក់ដូរនេះមិនមែនតែនៅខាងខេត្តប៉ៃលិនមួយឡើយ គឺលោកបានទៅលក់ដល់ទីរួមខេត្តបាត់ដំបង បន្ទាយមានជ័យ ពោធិ៍សាត់ តែអត់មាននរណាម្នាក់ រករឿងអ្វីលោកនោះទេ ព្រោះគេដឹងថាខាងលោកមានច្បាប់ចេញមកពីក្រសួង ហើយនេះជាការលក់ដូរទីផ្សារសេរី ។ ម្យ៉ាងវិញទៀត នេះជាការរកស៊ីនៅក្នុងស្រុកមិនមែនឆ្លងដែនពីប្រទេសមួយទៅប្រទេសមួយឯណា ។ រីឯអង្ករ ត្រីសាច់ និងបន្លែបង្ការផ្សេងៗ មួយចំនួនក៏គេដឹកយកមកពីខេត្តផ្សេងៗ ដែរ តែមិនឃើញមានខាងណាចា ប់ឃាត់នោះឡើយ ដោយខ្លះអត់ទាំងមានច្បាប់ថែមទៀតផង លោកពិតជាអស់ជំនឿ ។
ពាក់ព័ន្ធទៅនឹងបញ្ហានេះលោក សុខ សាធីម ប្រធានម្ទីរពាណិជ្ជកម្មខេត្តប៉ៃលិន បានឱ្យដឹងថា ច្បាប់អនុញ្ញាតិរបស់ខេត្តប៉ៃលិន មិនទាន់បានចេញឱ្យនោះទេ ។ ចំណែកលិខិតបើក ទីតាំងគឺខាងប៉ៃលិន បានចេញឱ្យរួចរាល់អស់ហើយ ។ លោកបន្តទៀតថា ខាងលោកបានដាក់ច្បាប់ជូនខេត្តរួចរាល់អស់ហើយ តែច្បាប់នាំចូលមិនទាន់មាននៅឡើយទេ ។
ម្យ៉ាងវិញទៀត ដោយសារខាងនាយករដ្ឋបាលសាលាខេត្ត គាត់មានធុរៈទៅបំពេញភារកិច្ចនៅប្រទេសថៃ ទើបមិនទាន់ចេញច្បាប់ឱ្យដំណើរការ ប្រហែលជាគាត់ត្រឡប់មកវិញ អាចទទួលបាន ហើយម្ចាស់អាជីវកម្មខាងលើអាចលក់ដូរដូចធម្មតាបាន ។
ចំណែកលោក ជា ចាន់ឌិន ស្នងការនគរបាលខេត្តប៉ៃលិន បានឱ្យដឹងតាមទូរស័ព្ទកាល ពីរសៀលថ្ងៃទី១៨ ខែកញ្ញានេះថា ខាងសាលាខេត្ត ជាអ្នកបញ្ជាឱ្យខាងលោកចាត់នគរបាលសេដ្ឋកិច្ច ចុះទៅចាប់ឃាត់រថយន្តដឹកទឹកកកអនាម័យនោះ យកទៅរក្សាទុកនៅស្នងការដ្ឋាន ព្រោះម្ចាស់អាជីវកម្មខាងលើ បានធ្វើកិច្ចសន្យាថា នឹងមិនចូលទៅលក់ដូរក្នុងខេត្តប៉ៃលិនបន្តទៀត ដោយដាច់ខែកញ្ញានេះ ត្រូវតែចរចាថានឹងឈប់នាំទឹកកកចូលតែម្តង ។
ប្រជាពលរដ្ឋរស់នៅក្នុងខេត្តប៉ៃលិន បានរិះគណ់ឱ្យដឹងថា មូលហេតុដែលគេមិនឱ្យទឹកកកអនាម័យពីខេត្តបាត់ដំបងចូលទៅលក់ដូរនៅក្នុងខេត្តប៉ៃលិន ដោយសារតែនៅក្នុងខេត្តនេះ មានកូនចៅអ្នកមានលុយមានអំណាចផលិតទឹកកកអនាម័យដែរ ដូច្នេះគេផ្តាច់មុខតែម្នាក់ឯង ពោលគឺចង់រស់តែម្នាក់ឯង ។
ប្រជាពលរដ្ឋបន្តទៀតថា ទឹកកកអនាម័យមួយចំនួនក្នុ ងខេត្តប៉ៃលិន អត់មានគុណភាពនោះទេ ដោយប្រើទឹកមិនស្អាតយកទៅផលិត ជួនកាលធុំក្លិន ព្រាំថែមទៀតផង លុះមានអ្នកក្រៅគេផលិតបានល្អជាង ហើយលក់ដាច់ជាងទើបប្តឹងបែបនេះ ៕
អ៊ុក ទូច
