មណ្ឌលគិរី៖ អភិបាល នៃគណៈអភិបាលខេត្តមណ្ឌលគិរី ឯកឧត្តម ស្វាយ សំអ៊ាង និងលោកជំទាវ បានអញ្ចើញទៅកាន់បិណ្ឌវេណទី០៣ នៅវត្តសែនមនោរម្យ ស្ថិតក្នុងក្រុងសែនមនោរម្យ កាលពីព្រឹកថ្ងៃទី១៩ ខែកញ្ញា ឆ្នាំ២០១៦នេះ ។ហើយនៅក្នុងពិធីកាន់បិណ្ឌនេះដែរឃើញមានការចូលរួមពីសំណាក់លោកជំទាវ អាយស៊ី សុគន្ធារី អភិបាលរងខេត្ត ព្រមទាំងមន្ត្រីរាជការក្រោមឪវាទ និងពុទ្ធបរិស័ទ្ធជិតឆ្ងាយទាំងអស់ផងដែរ។
ពិធីបុណ្យកាន់បិណ្ឌវេណទី០៣នោះ ថ្នាក់ដឹកនាំខេត្ត មន្ត្រីរាជការ និងប្រជាពលរដ្ឋទាំងអស់ បាននាំយកនូវទេយ្យវត្ថុ និងគ្រឿងឧបភោគបរិភោគ ទៅប្រគេនដល់ព្រះសង្ឈ ទៅតាមគន្លងប្រពៃណី ព្រះពុទ្ធសាសនា និងទំនៀមទំលាប់ខ្មែរពីបុរាណ ដើម្បីឧទ្ទិសមគ្គផល និងកុសល្យផលបុណ្យជូនដល់ដួងវិញ្ញាណក្ខន្ធ បុព្វការីជនមាន មាតា បិតា ជីដូនជីតា និងញាតិកាទាំង៧សន្តាន ព្រមទាំងវីរៈយុទ្ធជន យុទ្ធនារី អ្នកស្នេហាជាតិទាំងអស់ ដែលបានធ្វើមរណៈកាលទៅកាន់លោកខាងមុខ ក្នុងបុព្វហេតុជាតិទឹកដី សូមឲ្យទទួលបាននូវសុខគតិភពកុំបីឃ្លៀងឃ្លាតឡើយ។
នាឱកាសនោះ ឯកឧត្តម ស្វាយ សំអ៊ាង អភិបាលខេត្ត និងមន្ត្រីរាជការ បានប្រគេនទេយ្យវត្ថុ និងផ្តល់បច្ច័យដល់ព្រះសង្ឃចំនួន១៧អង្គ សរុបជាង១លានពីរសែនរៀល រួមទាំងមាន៖ អង្ករ៥០គីឡូក្រាម ទឹកផ្លែឈើ ទឹកស៊ុត ស្ករស ទឹកដោះគោ ទឹកស៊ីអ៊ីវ មី តែ ព្រមទាំងផ្តល់បច្ច័យជូនយាយជី តាជីចំនួន៣០នាក់ ក្នុងនោះយាយជីម្នាក់ៗទទួលបាន១ម៉ឺនរៀល តាជីចំនួន០៦នាក់ ម្នាក់ៗទទួលបាន១ម៉ឺន៥ពាន់រៀល។ហើយពិធីបុណ្យកាន់បិណ្ឌវេណទី០៣ ឯកឧត្តម ស្វាយ សំអ៊ាង អភិបាលខេត្ត ព្រមទាំងមន្ត្រីរាជការ ក៏បានបួងសួងសុំនូវសេចក្តីសុខដល់ថ្នាក់ដឹកនាំមន្ត្រី រាជការ និងប្រជាពលរដ្ឋទាំងអស់ក្នុងខេត្តមណ្ឌលគិរី ។
សូមបញ្ជាក់ថា ពិធីបុណ្យកាន់បិណ្ឌមានរយៈ១៤ថ្ងៃ ចាប់ថ្ងៃទី២៨ ខែកញ្ញានេះ ត្រូវនឹងថ្ងៃទី ១រោច ខែភទ្របទ រហូតដល់ថ្ងៃទី១១ ខែតុលា ឆ្នាំ២០១៥ ត្រូវនឹងថ្ងៃ១៤រោច ខែភទ្របទ ហើយថ្ងៃទី១២ ខែតុលា ត្រូវនឹងថ្ងៃ១៥ រោច ខែភទ្របទ គឺជាថ្ងៃភ្ជុំបិណ្ឌធំ ដែលប្រជាពលរដ្ឋខ្មែរ អ្នកកាន់ព្រះពុទ្ធសាសនា តែងតែអញ្ជើ ញទៅប្រារព្ធពិធីបុណ្យកាន់បិណ្ឌទៅតាម ទំនៀមទម្លាប់ប្រពៃណីខ្មែរ នៅតាមទីវត្តអារាមនានារៀងៗខ្លួន៕
