ហ្មរដំរីជនជាតិព្នងម្នាក់ត្រូវបានសម្លាប់ដោយដំរីរបស់ខ្លួនដែលកំពុងតែស្ថិតក្នុងសភាពចុះប្រេងបានចាប់គ្រីវីគ្រវាត់ជាន់ទន្ទ្រាំរហូតធ្លាយពោះស្លាប់នៅនឹងកន្លែងកើតហេតុតេម្តង ។ ករណីភ្ញាក់ផ្អើលនេះ បានកើតឡើងនៅចំនុចភូមិពូក្រូច ឃុំស្រែអំពូម ស្រុកពេជ្រាដា ខេត្តមណ្ឌលគិរី កាលពីវេលាម៉ោងប្រមាណ១២ និង១៥នាទីថ្ងៃទី១៩ខែកញ្ញាឆ្នាំ២០១៦នេះ។
សមត្ថកិច្ចបានឲ្យដឹងថា ជនរងគ្រោះឈ្មោះម៉ុប ស្រេង ភេទប្រុស អាយុ៤៥ឆ្នាំ ជាជនជាតិព្នងដែលជាម្ចាស់ដំរី ត្រូវបានសត្វដំរីរបស់ខ្លួនចាប់បោកដោយប្រមោយ ថែមទាំងរុញផ្ទុបដោយភ្លុក រួចជាន់ទន្ទ្រាំ បណ្តាលឲ្យដាច់ខ្យល់ស្លាប់ ភ្លាមៗនៅនិងកន្លែងកើតហេតុ។សមត្ថកិច្ចបន្តថា បើតាមសំដីរបស់គ្រួសាររងគ្រោះ បានឲ្យដឹងនោះគឺ សត្វដំរីដែល ស្ថិត ក្រោមការមើលថែររបស់ជនរងគ្រោះដែលបានបាត់ពីផ្ទះដែលស្ថិតនៅភូមិពូរលូង ឃុំស្រែអំពូម។លុះទទួលដំណឹងថា សត្វដំរីនោះនៅភូមិពូក្រូច ឃុំស្រែអំពូម ជនរងគ្រោះបានទៅទីនោះដើម្បីយកសត្វដំរី ត្រឡប់ទៅផ្ទះរបស់ខ្លួនវិញ។ ក្រោយពីប្រទះឃើញសត្វដំរីរបស់ខ្លួននោះហើយ សត្វដំរីដែលមានសភាពដូចជាមួម៉ៅបានចាប់បោកនិងបុកទំលុះ ធ្លាយពោះជនរងគ្រោះស្លាប់តែម្តង។
នគរបាលខេត្តមណ្ឌលគិរីបានឲ្យដឹងនៅវេលាម៉ោង២និ៣៣នេះថា ក្រោយសម្លាប់ជនរងគ្រោះរួចសត្វដំរីដែល មានសភាពចុះប្រេងនោះបានរត់តាមផ្លូវបង្ករភាពភ័យខ្លាចដល់អ្នកដំណើរ ក្រោយមកវាបានរត់ចូលព្រៃស្ថិតក្នុងភូមិ សាស្ត្រឃុំស្រែអំពូមដដែល តែទោះជាយ៉ាងណាគេនៅមិនទាន់ប្រទះឃើញដំរីនោះនៅឡើយ។
គ្រួសារជនរងគ្រោះបានស្នើរមកនគរបាលផងដែរថា ប្រសិនបើឃើញដំរីនោះចេញពីព្រៃ សូមឲ្យសមត្ថកិច្ច បាញ់សម្លាប់ដំរីនោះភ្លាម កុំឲ្យវាធ្វើអ្វីដែលនាំឲ្យប៉ះពាល់ប្រជាពលរដ្ឋបន្តទៀត។ក្នុងនោះអង្គការកាពារសត្វដំរីដែល មានមូលដ្ឋាននៅក្នុងខេត្តមណ្ឌលគិរីភ្នាក់ងារព៌ត័មានយើងមិនអាចសុំធ្វើការបំភ្លឺបាននោះទេនារសៀលថ្ងៃដដែលនេះ។
សូមបញ្ជាក់ផងដែរថា សមត្ថកិច្ចកំពុងតែដាក់កម្លាំងពង្រាយតាមដងផ្លូវក៏ដូចជាតាមភូមិឃុំដែល មានប្រជាពល រដ្ឋរស់នៅ ដើម្បីបង្ការកុំឲ្យសត្វដំរីនោះចេញមករាត្បាតប៉ះពាល់អាយុជីវិតមនុស្សផងដែរ៕ គឹម ចំរើន
