ការតែងតាំងមុខតំណែងអភិបាលរងខេត្តនេះ គឺជាដំណើរការធម្មតានៃការរៀបចំមុខតំណែងមន្ត្រីរាជការក្នុងគោល បំណងបន្តនិរន្តរភាព និងចូលរួមក្នុងការជម្រុញប្រសិទ្ធភាពការងារដឹកនាំគ្រប់គ្រងរដ្ឋបាលខេត្តឱ្យបានកាន់តែល្អប្រសើរ ទៅ តាមកម្មវិធីនយោបាយ និងយុទ្ធសាស្ត្រចតុកោណដំណាក់កាលទី ៣ របស់រាជរដ្ឋាភិបាលសម្រាប់នីតិកាលទី ៥ នៃរដ្ឋសភា ។
លោក លេង វី អនុរដ្ឋលេខាធិការក្រសួងមហាផ្ទៃ បានមានប្រសាសន៍ដូចនេះ ក្នុងពេលអញ្ជើញជាអធិបតីក្នុងពិធី ប្រកាសតែងតាំងចូលកាន់មុខតំណែងរបស់លោក ស៊ឹម វុទ្ធា នាយករដ្ឋបាលសាលាខេត្ត ជាអភិបាលរងខេត្ត ជំនួសលោក ហេង វន្ថា អភិបាលរងខេត្តដែលត្រូវចូលនិវត្តន៍ ។ លោកអនុរដ្ឋលេខាធិការ បានថ្លែងកោតសរសើរ និងវាយតម្លៃខ្ពស់ចំពោះលោក ស៊ឹម វុទ្ធា ជាមន្ត្រីដែលបានប្រឡូកក្នុងការងារនៅមូលដ្ឋានខេត្តកំពត តាំងពីឆ្នាំ១៩៩៨ មានបទពិសោធន៍លើការងារដឹកនាំ និងគ្រប់គ្រងបានល្អ ដោយសារលោកបានកាន់មុខតំណែងជាបន្តបន្ទាប់ រហូតក្លាយជានាយករដ្ឋបាលសាលាខេត្ត មុននឹងលោកមកទទួលតំណែងជាអភិបាលរងខេត្តនាពេលនោះ ។
ក្នុងនាមរាជរដ្ឋាភិបាល ក្នុងនាមសម្តេចក្រឡាហោម ស ខេង និងក្នុងនាមខ្លួនលោកផ្ទាល់សូមសម្តែងនូវការកោតសរ សើរ និងវាយតម្លៃខ្ពស់ចំពោះលោក ហេង វន្ថា ដែលបានធ្វើពលីកម្មយ៉ាងធំធេងក្នុងការចូលរួមដឹកនាំគ្រប់គ្រងកសាង អភិវឌ្ឍន៍ប្រទេសជាតិ ក្នុងមុខតំណែងជាបន្តបន្ទាប់តាំងពីលោកបានចូលបម្រើការងារតាំងពីឆ្នាំ ១៩៧៩ មកផងដែរ ។
លោកអនុរដ្ឋលេខាធិការ ក៏បានមានប្រសាសន៍ផ្តាំផ្ញើ នឹងសំណូមពរដល់ក្រុមប្រឹក្សាខេត្ត អភិបាលខេត្ត ស្រុក-ក្រុង ឃុំ-សង្កាត់ នៅទូទាំងខេត្ត សូមចូលរួមសហការការងារល្អជាមួយលោក ស៊ឹម វុទ្ធា ដែលទើបនឹងទទួលតំណែងជាអភិបាលរងខេត្តនាពេលនេះ ៕
ដោយ ៖ សារ៉េត
