ខេត្តប៉ៃលិន ៖ បើទោះបីជាអាជ្ញាធរខេត្តប៉ៃលិន បានសហការជាមួយមន្ត្រីនៃមន្ទីរពា ក់ព័ន្ធជាច្រើនស្ថាប័នដូចជា មន្ទីរពាណិជ្ជកម្ម មន្ទីរកសិកម្ម សាខាកាំកុងត្រូលខេត្ត សមត្ថកិច្ចអន្តោប្រវេសន៍ សាខាគយ និងរដ្ឋាករ សមាគមកសិកម្មខេត្ត បាននាំគ្នាសស្រាក់សស្រាំ ចូលទៅជួបចចារជាមួយថៃ ក្នុងទឹកដីខេត្តចាន់បូរី ប្រទេសថៃ ដើម្បីសុំថៃបើកឱ្យអាជីវករ ខ្មែរ នាំកសិផលផ្លែស្វាយកែវរមៀត ចូលទៅលក់ដូរនៅទីនោះ ។ តែលទ្ធផលចុងក្រោយ គឺខាងភាគីថៃ នៅតែមិនព្រមអនុញ្ញាតឱ្យចូលទៅលក់ដូរក្នុងប្រទេសគេដដែល ដោយតម្រូវឱ្យខាងក្រសួងកសិកម្មនៃប្រទេសកម្ពុជា ធ្វើលិខិតស្នាមបញ្ជាក់ពីគុណភាពផ្លែស្វាយ តាមលក្ខណៈស្តង់ដារអន្តរជាតិជាមុនសិន ទើបគេយល់ព្រម ។
សូមបញ្ជាក់ថា កាលពីព្រឹកថ្ងៃទី១៣ ខែកញ្ញា កន្លងទៅនេះ ប្រជាពលរដ្ឋ និងអាជីវ ករ ជាង៤០នាក់ បាននាំគ្នាតវ៉ានៅក្នុងមន្ទីរកសិកម្មខេត្តប៉ៃលិន ដើម្បីសុំឱ្យខាងភាគីថៃបើកឱ្យពួកគេ ដឹកផ្លែស្វាយកែវរមៀត ចូលទៅលក់ដូរនៅទីនោះ ខណៈថៃបិទមិនឱ្យចូលតាំងពី ថ្ងៃទី០៨ ខែកញ្ញា មកម្លេះ ធ្វើឱ្យរាំងស្ទះដល់ការនាំកសិផលចេញយ៉ាងខ្លាំង រីឯទំនិញថៃគ្រប់ប្រភេទ បានហូរចូលមកក្នុងទឹកដីខ្មែររាល់ព្រឹកថ្ងៃល្ងាចយប់ យ៉ាងគគ្រឹកគគ្រេង ដោយមិនគិតអំពីបញ្ហាខូចគុណភាពនោះឡើយ ។
គួររំលឹកថា កាលពីថ្ងៃទី១៤ ខែកញ្ញា កន្លងទៅនេះ អាជ្ញាធរខេត្តប៉ៃលិន បាននាំគ្នាចូលទៅជួបប្រជុំចចារ នៅក្នុងខេត្តចាន់បូរី ប្រទេសថៃ ពេញមួយថ្ងៃ ដើម្បីសុំបើកផ្លូវឱ្យអា ជីវករខ្មែរ នាំផ្លែស្វាយកែវរមៀត ចូលទៅលក់ដូរនៅទីនោះ ដូចកាលពីមុន ។ តែខាងភាគីថៃមិនអនុញ្ញតឡើយ លើកលែងតែក្រសួងកសិកម្មខ្មែរ រៀបចំឯកសារបញ្ជាក់ពីគុណភាពផ្លែស្វាយជាមុនសិន ។ រហូតដល់រសៀលថ្ងៃទី១៥ ខែកញ្ញានេះ ខាងក្រសួងកសិកម្មរួមជា មួយអាជីវករជាង២០នាក់ បានជួបប្រជុំគ្នាបន្ទាន់សារជាថ្មី នៅក្នុងការិយាល័យច្រកទ្វារអន្តរជាតិព្រំ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ដើម្បីពិភាក្សារកដំណោះស្រា យ ចំពោះបញ្ហាជាប់គាំង នូវការនាំចេញផ្លែស្វាយកែវរមៀតនេះដែរ តែមិនទាន់បានលទ្ធផ លយ៉ាងណានៅឡើយទេ ។
ពាក់ព័ន្ធទៅនឹងបញ្ហានេះលោក សុខ សាវុធ ប្រធានការិយាល័យ ច្រកទ្វារអន្តរជាតិព្រំ បានឱ្យដឹងថា កិច្ចប្រជុំរវាងភាគី កម្ពុជា ជាមួយនឹងថៃក្នុងខេត្តចាន់បូរី កាលពីថ្ងៃទី១៣ ខែកញ្ញា កន្លងទៅ ពាក់ព័ន្ធនឹងបញ្ហាថៃបិទមិនឱ្យខ្មែរនាំផ្លែស្វាយកែវរមៀតចូលទៅលក់ដូរនៅប្រទេសគេ មិនទាន់ទទួលបានលទ្ធផលនៅឡើយទេ ព្រោះខាងភាគីថៃ ទាមទារឱ្យខា ងក្រសួងកសិកម្មខ្មែរយើង ធ្វើលិខិតបញ្ជាក់ពីគុណភាពផ្លែស្វាយកែវរមៀតជាមុនសិន មុននឹងនាំចូលទៅលក់នៅប្រទេសរបស់គេ ដោយព្រោះគេថា ធ្លាប់ពិនិត្យឃើញផ្លែស្វាយរបស់ខ្មែរយើង មានសត្វល្អិតនៅក្នុងគ្រាប់ មានបាក់តេរី ហើយមានផ្សិតខ្មៅៗផងដែរ ។
លោកបន្តទៀតថា នៅពេលខាងមុខឆាប់ៗ នេះ ខាងខ្មែរយើងនឹងជួបប្រជុំជាមួយ ខាងថៃជាលក្ខណៈជាតិ ដោយក្រសួងកសិកម្មខ្មែរ ជួបជាមួយនឹងក្រសួងកសិកម្មថៃ ដើម្បីដោះស្រាយបញ្ហានេះ ហើយខាងលោកក៏នឹងចាត់ការរឹតបន្តឹងចំពោះការនាំទំនិញរបស់ភាគីថៃចូលមកប្រទេសខ្មែរផងដែរ ។
លោកបញ្ជាក់ទៀតថា ខាងយើងមិនទាន់អស់សង្ឃឹមនៅឡើយទេ បើទោះបីជាខាងភាគីថៃបិទការនាំចូលក៏ដោយ ព្រោះខាងប្រទេសកូរ៉េ គេចូលមកកុម្មង់ទិញផ្លែស្វាយកែវរមៀតនេះ ចូលទៅក្នុងប្រទេសរបស់គេផងដែរ ។
ចំណែកក្រុមអាជីវករ កំពុងតែខ្វល់ខ្វាយ ព្រួយបារម្ភយ៉ាងខ្លាំង ខណៈពួកគេបានម៉ៅ ដើមស្វាយ របស់ប្រជាពលរដ្ឋនៅតាមចម្ការក្នុងភូមិនីមួយៗ ដើម្បីដាក់អ័រម៉ូនឱ្យផ្លែ រួចដល់រដូវប្រមូលផល បេះលក់ឱ្យទៅប្រទេសថៃ ។ តែពេលនេះ ខាងភាគីថៃនិយាយរកលេសពីនេះពីនោះ ក្នុងគោលបំណងបញ្ចុះតម្លៃកសិផលរបស់ខ្មែរ ទើបមានការលំបាកបែបនេះ តាំ ងពីពោត ដំឡូងមីជាដើម ព្រោះតែកសិផលយើងពឹងដង្ហើមគេដក ហើយខាងមន្ទីរកសិកម្ម មិនធ្លាប់បង្រៀនពីបច្ចេកទេសក្នុងការដាំដុះ ក៏ដូចជាការរក្សាកសិផលឱ្យបានល្អសម្រាប់កា រនាំចេញនោះឡើយ ៕ ដោយ ៖ នីយ៉ា
