ខេត្តរតនគិរី៖ ក្រុមអ្នកកាសែត និងទូរទស្សន៍មួយក្រុមមានគ្នា៧នាក់ បានជិះរថយន្ត៣គ្រឿងម៉ាកាមរីស្វិត បើកបរពេលយប់ក្នុងក្រុងបានលុង ដើម្បីយកពត៌មានពេលយប់ក្រែងមានឡានដឹកឈើចូលមកក្នុងក្រុង នៅពេលអ្នកកាសែត និងទូរទស្សន៍បើកឡានលេងៗនោះ ស្រាប់តែប្រទះឃើញឡានដឹកឈើមួយគ្រឿង ម៉ាកសាំយ៉ុងពណ៌ស ដឹកឈើប្រណិតពេញប្រៀប ពេលនោះ ក្រុមអ្នកកាសែតក៏បានដេញ ថតយករូបភាព ស្រាប់តែឡានដឹកឈើនោះ បើករត់គេចក្រុមច្រកល្ហក ហើយក៏ចូលមកពួននៅក្រោយមន្ទីរកសិកម្ម និងក្រោយកន្លែងខណ្ឌរដ្ឋបាលព្រៃឈើ។
ហេតុការណ៍នេះកើតឡើងនៅចំណុចភូមិអូរកន្តិល សង្កាត់បឹងកន្សែង ក្រុងបានលុង វេលាម៉ោង២និង១៥នាទីឈប់ឈានចូលថ្ងៃទី៣ ខែកញ្ញា ឆ្នាំ២០១៦។
នៅពេលនោះ អ្នកកាសែតកំពុងតែបើកឡានដេញថតឡានដឹកឈើនោះ ស្រាប់តែលេចមុខក្មេងស្ទាវជាង១០នាក់ប្រដាប់ដោយដំបង កាំបិត ដុំថ្ម និងអង្អែរបុកគ្រឿង បានមកស្ទាក់រថយន្តអ្នកកាសែតមុខក្រោយ និងបានធ្វើសកម្មភាពគប់ឡានអ្នកកាសែត បណ្តាលអោយបែកកញ្ចក់ចំនួន២កន្លែងទី១បែកកញ្ចក់ទ្វារខាងធ្វេងក្រោយតៃកុង ទី២ កញ្ចក់ចំហៀងខាងស្តាំងសំរាប់មើលក្រោយ។
ក្រុមក្មេងស្ទាវទាំងនោះក្រោយពីធ្វើកម្មភាពហើយបានរត់គេចខ្លួនបាត់អស់ទាំងយប់ ហើយក្នុងពេលកើតហេតុនោះដែរ ក៏មានបុរសម្នាក់ជិះរថយន្តម៉ាកហាយប្រ៊ីកមួយគ្រឿង ពណ៌ស ពាក់ស្លាកលេខភ្នំពេញ2RF-0868 កាងពីក្រោយជាប់ត្រូវគេដឹងថាជាថៅកែឈើប្រណិត។
ក្រុមអ្នកកាសែតដែលត្រូវក្រុមក្មេងស្ទាវស្ទាក់វ៉ៃកាលពីយប់មិញនេះ១. ទូរទស្សន៍ខ្សែកាបប៉ុស្តិ៍លេខ៣ ២. កាសែតជាតិ ៣.សង្គមកម្ពុជា ៤.ភ្នំពេញប្រេស ៥.គំនិតខ្មែរ ៦.ប៉ាផ្កាសេរីសន្តិភាព ៧.មាតុភូមិ។
ក្រោយពីកើតហេតុភ្លាមៗនោះដែរ ប្រជាពលរដ្ឋដែលមានលំនៅដ្ឋាននៅក្បែរនោះ គាត់ពុំឃើញមានសមត្ថកិច្ចមូលដ្ឋានណាមួយចេញមកជួយអន្តរាគមន៍ដល់ក្រុមអ្នកកាសែតនោះទេ លុះព្រឹកឡើងថ្ងៃទី០៣ ខែកញ្ញា ឆ្នាំ២០១៦ ក្រុមអ្នកកាសែបានដាក់ពាក្យបណ្តឹងនៅការិយាល័យ ព្រហ្មទណ្ឌកំរិតស្រាលនៃស្នងការខេត្តរតនគិរី ដើម្បីអោយសមត្ថកិច្ច រកមុខជនបង្កយកមកផ្តន្ទាទោសតាមផ្លូវច្បាប់ និងជួយរកយុត្តិធម៌ដល់ក្រុមអ្នកកាសែតទាំងនោះផង៕
