កំពង់ធំ ៖ កាលពីថ្ងៃទី ១៨ ខែសីហា នេះ ឯកឧត្តម ឧត្តមសេនីយ៍ឯក ហ៊ុន ម៉ាណែត នាយរង សេនាធិការចម្រុះ នៃកងយោធពល ខេមរភូមិន្ទ មេបញ្ជាការង កងទ័ពជើងគោក មេបញ្ជាការ បញ្ជាការរដ្ឋានជាតិ កម្លាំងពិសេស ប្រឆាំងភេវៈកម្ម បានអញ្ជើញចូលរួមសម្ពោធសមិទ្ធិផលនានា ដាក់ឱ្យប្រើប្រាស់ ជាផ្លូវការ នៅទីបញ្ជាការ តំបន់ប្រតិបត្តិការ សឹករង ខេត្តកំពង់ធំ ស្ថិតនៅ ក្នុង ភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ។
នាឱកាសនោះ ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានជម្រាបជូនអង្គពិធីអំពីការសាងសង់ រហូតដល់លេចឡើងនូវសមិទ្ធផលទាំងអស់នេះ ។
ឯកឧត្តម ឧត្តមសេនីយ៍ឯក ហ៊ុនម៉ាណែត បានលើកឡើងថា ការសាង់សង់នេះ គឺពិតជាមានតំលៃខ្លាំងណាស់ ក្នុងស្មារតីចូលរួម ពីសំណាក់ ស្ថាប័នរដ្ឋ ស៊ីវិល ឧកញ៉ា ក្រុមហ៊ុន អជីវករ និងសប្បុរសជន ដោយការខិតខំយកចិត្តទុកដាក់ខ្នះខ្នែងទាក់ទង របស់មេបញ្ជាការសឹករងខេត្ត រួមផ្សំនឹងគុណធម៌ល្អប្រពៃ ធ្វើឲ្យមានការគាំទ្រ សម្រេចបានសមិទ្ធិផលទាំងនេះឡើង សម្រាប់បំរើការងារពង្រឹង យុទ្ធសាស្ត្រផ្សេងៗ របស់តំបន់ប្រតិបត្តិការសឹក និងគណៈបញ្ជាការឯក ភាពខេត្ត ។
ឯកឧត្តម បានរំលឹកពីគុណបំណាច់ ចំពោះអតីតយុទ្ធជន ដែលបានពលីជីវិត សម័យសង្គ្រាម ដើម្បីកែលំអរ ឲ្យមាន សោភ័ណភាព ឲ្យស័ក្កសមនឹង តំលៃបូជា អាយុជីវិតរបស់ យុវជន យុវនារី ដែលបាន ពលីកម្ម ក្នុងសម័យសង្គ្រាមកន្លទៅនោះ ។
ឯកឧត្តម ឧត្តមសេនីយ៍ឯក ហ៊ុនម៉ាណែត បានមានប្រសាសន៍ កោតសរសើរនឹងវាយតំលៃខ្ពស់ ចំពោះមេបញ្ជាការ មេបញ្ជាការង និងអាជ្ញាធរខេត្តកំពង់ធំ ដែលបានសហការគាំទ្រពីសំណាក់ កងទ័ពវៀតណាម បានជម្រុញឲ្យមានការសាងសង់បន្ទាយដែលជាគ្រិះដ៏រ៉ឹងមាំ និងសូមថ្លែងអំណរគុណដល់ អ៊ុំ ពូ មីង លោកតា លោកយាយ ពុកម៉ែ ប្រជាពលរដ្ឋ ដែលមានគាំទ្រ និងជឿទុកចិត្តដល់រាជរដ្ឋាភិបាល ក្នុងការដឹកនាំ ជឿទុកចិត្ត ដល់សម្តេចអគ្គមហា សេនាបតីតេជោ ហ៊ុន សែន ក្នុងការដឹកនាំប្រទេសមកដល់ពេលនេះ និងសូមឲ្យការគាំទ្រ របស់លោកតា លោកយាយ គាំទ្របន្តដើម្បីដឹកនាំប្រទេសតទៅទៀត ។
ក្នុងនោះឯកឧត្តម ឧត្តមសេនីយ៍ឯក ហ៊ុន ម៉ាណែត បានផ្តាំផ្ញើរដល់តំបន់ប្រតិបត្តិការសឹក និងគណៈបញ្ជាការឯក ភាពខេត្ត ដើម្បីបំផុសស្មារតី ក្នុងការងារអទិភាពត្រូវយកអស់ស្មារតីគោរឲ្យបានម៉ឺងម៉ាត់ នូវបទបញ្ជារចរាចរណ៍ណែនាំ លក្ខន្តិកៈនិងគតិយុទ្ធនានា ប្រកាន់ភ្ជាប់នូវ ប្រពៃណីសេចក្តីថ្លៃថ្នូរ របស់កងយោធពលខេមរភូមិន្ទ ជាកងកម្លាំងរបស់ប្រជាជាតិ ក្នុងបុព្វហេតុការពារជាតិមេតុភូមិយើង ។
លោកបន្តថា យើងត្រូវបន្តយកចិត្តទុកដាក់ បង្កើនការងារស្មារតីឆន្ទះមនសិកា ស្នេហាជាតិ ចូលរួមការងារ រក្សាសន្តិសុខ សណ្តាប់ធ្នាប់សង្គម និងចូលរួមបង្ក្រាប បទល្មើសផ្សេងៗ ក្នុងការ ស្តារអភិវឌ្ឍន៍ប្រទេសជាតិ ឲ្យមានការរីចំរើន ។ហើយបន្តការខិតខំប្រឹងប្រែងយកចិត្តទុក ដាក់ លើការងារហ្វឹកហ្វឺន កសាងប្រភពធនធានមនុស្ស ឲ្យមានបរិមាណ និងគុណភាព ឆ្លើយតបនិង កំណែទម្រង់របស់កងយោធពលខេមរភូមិន្ទ ។
យើងត្រូវតែបង្កើនការយកចិត្តទុកដាក់ គ្រប់គ្រងថែរក្សាគ្រឿងសព្ទាវុធ និងឯកសារគ្រប់បែបយ៉ាងឲ្យ បានគង់វង្ស និងមានប្រសិទ្ធិភាព ធានាដល់ការ បំរើសមរភូមិបានយូរអង្វែង ។ ហើយត្រូវយកចិត្តទុកដាក់ ចូលរួម រាល់កិច្ចការសង្គម ទាំងសម្ភារៈ មធ្យោបាយគ្រប់យ៉ាង ដើម្បីជួយសង្គ្រោះប្រជាពលរដ្ឋ និងសហការ ជាមួយស្ថាប័ន មានសមត្ថកិច្ច ក្នុងកិច្ចដំណើរការ ជួយសង្គ្រោះ ប្រជាពលរដ្ឋ ឲ្យបានទាន់ពេលវេលា ៕
