ខេត្តប៉ៃលិន៖ ព្រឹកថ្ងៃទី១៥ ខែសីហា ឆ្នាំ២០១៦ លោក កើត សុធា អភិបាលនៃគណៈអភិបាលខេត្តប៉ៃលិន បានអញ្ជើញបើកការដ្ឋានជួសជុល ផ្លូវក្រាលក្រួសក្រហម១ខ្សែប្រវែង ៤៨៥០ម៉ែត្រ ទទឹង៧ម៉ែត្រ ចាប់ពីចំណុចគល់ស្ពានប៉ាឡេ ភូមិអូរតាវ៉ៅ សង្កាត់អូរតាវ៉ៅ ក្រុងប៉ៃលិន ដល់ផ្លូវបំបែកខ្ទមអ្នកតា ភូមិសួនអំពៅកើត(ចំណុចទឹកផុស) សង្កាត់ប៉ៃលិន ក្រុងប៉ៃលិន ។ ក្នុងពិធីនេះក៏មានការអញ្ជើញចូលរួមពីលោក សោ សុវណ្ណ នាយករងរដ្ឋបាលខេត្ត ,លោក ឌិន គឹម ប្រធានមន្ទីរសាធារណៈការ និងដឹកជញ្ជូនខេត្តប៉ៃលិន ,លោកប្រធានក្រុមប្រឹក្សាក្រុង ព្រមទាំងថ្នាក់ដឹកនាំមន្ទីរជំនាញ , មន្ត្រីរាជការគ្រប់ជាន់ថ្នាក់ កងកម្លាំង និងប្រជាពលរដ្ឋជាច្រើនរូបផងដែរ។
លោក ឌិន គឹម ប្រធានមន្ទីរសាធារណៈការ និងដឹកជញ្ជូនខេត្តប៉ៃលិន បានសម្តែងនូវក្តីរីករាយ ដោយ ខេត្ត បាននិងកំពុងកសាងជួសជុលផ្លូវដែលជាសមិទ្ធិផលមួយចំនួនបន្ថែមទៀត ទុកឲ្យប្រជាពលរដ្ឋយើងប្រើប្រាស់ប្រចាំថ្ងៃ និងជួយសម្រួលការកាត់បន្ថយការលំបាក របស់ប្រជាពលរដ្ឋយើងបានមួយកម្រិតទៀត ។ លោក បានឲ្យដឹងដែរថា៖ ផ្លូវដែលចាប់ផ្តើមជួសជុលនេះ មានប្រវែង ៤៨៥០ម៉ែត្រ ទទឹង៧ម៉ែត្រ ចាប់ពីចំណុចគល់ស្ពានប៉ាឡេ ភូមិអូរតាវ៉ៅ សង្កាត់អូរតាវ៉ៅ ក្រុងប៉ៃលិន ដល់ផ្លូវបំបែកខ្ទមអ្នកតា ភូមិសួនអំពៅកើត(ចំណុចទឹកផុស) សង្កាត់ប៉ៃលិន ក្រុងប៉ៃលិន ដែលជាគំរោងរបស់មន្ទីរសាធារណៈការ និងដឹកជញ្ជូនខេត្តប៉ៃលិន ផងដែរ ។
លោក កើត សុធា អភិបាលនៃគណៈអភិបាលខេត្តប៉ៃលិន បានថ្លែងអំណរគុណ ចំពោះថ្នាក់ដឹកនាំមន្ទីរជំនាញ ជាពិសេសមន្ទីរសាធារណៈការនិងដឹកជញ្ជូនខេត្ត ដែលតែងតែ ខិតខំប្រឹងប្រែង ធ្វើការទាំងហាលភ្លៀងហាលថ្ងៃ គឺដើម្បីការងារជំនាញរបស់ខ្លួនសម្រេចជាហូរហែរកន្លងមក ។
លោកអភិបាលខេត្ត ក៏បានសំណូមដល់ប្រជាពលរដ្ឋ ក្រោយពីផ្លូវមួយខ្សែរនេះ រួចរាល់ សួមឲ្យយើងចេះជួយថែរក្សាឲ្យបានគង់វង្ស ព្រមទាំងផ្តាំផ្ញើដល់មន្ត្រីរាជការដែលមកចូលរួម ទាំងអស់សូមគិតផលប្រយោជន៍ ប្រជាពលរដ្ឋជាធំ ព្រោះប្រជាពលរដ្ឋ គឺជាម្ចាស់ឆ្នោត ដែលតែងតែគាំទ្រ គណបក្សប្រជាជនកម្ពុជាកន្លងមក និងអនាគត ហើយយើងទាំងអស់គ្នាជាអ្នកបម្រើរាស្ត្រ មិនមែនជាចៅហ្វាយរាស្ត្រនោះទេ ៕ដោយ ស ស រ នាគខៀវ ប៉ៃលិនជាយដែន
