(ខេត្តកែប)៖ នៅព្រឹកថ្ងៃទី២២ ខែវិច្ឆិកា ឆ្នាំ២០១៩ មន្ទីរបរិស្ថានខេត្តកែប សហការជាមួយអង្គការ ស្ការ៉ូ (CSARO)បានរៀបចំទិវាអនាម័យបរិស្ដានជាតិ ២៣វិច្ឆិកា ២០១៩ ក្រោមប្រធានបទ”ភូមិស្អាត សុខភាពល្អ”នៅវិទ្យាល័យ ប៊ុនរ៉ានី ហ៊ុនសែន ចរិយាវង្ស ក្នុងសង្កាត់អូរក្រសារ ក្រុង-ខេត្តកែប។
ទិវានេះ បានប្រព្រឹត្តិទៅក្រោមការចូលរួមពីលោក អឹុម បញ្ញារិទ្ធិ ប្រធានមន្ទីរបរិស្ថានខេត្តកែប និងលោក តែម វីរៈ តំណាងអង្គការ ស្ការ៉ូ ព្រមទាំងមានការចូលរួមពីសំណាក់លកគ្រូអ្នកគ្រូ សិស្សានុសិស្ស ក្នុងវិទ្យាល័យ ប៊ុនរ៉ានី ហ៊ុនសែន ចរិយាវង្សផងដែរ។
‘ក្នុងឱកាសនោះ លោក អឹុម បញ្ញារិទ្ធិ ប្រធានមន្ទីរបរិស្ថានខេត្តកែប បានឱ្យដឹងថា ក្នុងអំឡុងពេលបច្ចុប្បន្ននេះការវេចខ្ចប់ចំណីអាហារក៏ដូចជាមុខទំនិញនិងវត្ថុប្រើប្រាស់សុទ្ធតែត្រូវយកថង់ប្លាស្ទិកច្រកដាក់ឥវ៉ាន់ ដែលចាត់ទុកជាទម្លាប់មួយទៅហើយ។យ៉ាងណាមិញការប្រើថង់ប្លាស្ទិកសម្រាប់ដាក់ចំណីអាហារពិតជាបំពុលបរិស្ថានយ៉ាងធ្ងន់ធ្ងរព្រោះវាជាសារធាតុមិនរលាយ។លោកថា ពីមួយថ្ងៃទៅមួយថ្ងៃកំណើននៃជាតិប្លាស្ទិកកាន់តែច្រើនឡើងៗ ស្ថិតតាមលំនៅដ្ឋានរបស់យើង និងនៅតាមទីសាធារណៈ ព្រោះតែយើងម្នាក់ៗ មិនទាន់បោះបង់ការប្រើជាតិប្លាស្ទិកនៅឡើយ។
លោក អឹុម បញ្ញារិទ្ធិ បានបញ្ជាក់ផងដែរថា សម្ភារៈដែលផលិតមកពីជាតិកៅស៊ូបន្សំដោយជាតិគីមី រួមមាន៖ កែវឬកំប៉ុងជ័រ ដបទឹកសុទ្ធ ថង់ប្លាស្ទិក ព្រមទាំងសម្ភារៈជាច្រើនទៀតដែលយើងបោះចោលពាសវាលពាសកាល សុទ្ធសឹងជាប្រភេទសំណល់ប្លាស្ទិក ដោយរបស់ទាំងនេះមិនងាយពុកផុយ ឬរលាយបាត់រូបរាងនោះឡើយ ហើយសំណល់ប្លាស្ទិកនេះវានឹងបំពុលបរិស្ថាននៅគ្រប់ទីកន្លែង ខណៈយើងទាំងអស់គ្នាមិនចេះរក្សាសោភ័ណភាព និងសម្អាតអនាម័យ។
លោកប្រធានមន្ទីរបានគូសបញ្ជាក់ទៀតថា ការបោះចោលសំណល់ប្រភេទប្លាស្ទិកនឹងធ្វើឱ្យខូចសណ្តាប់ធ្នាប់សាធារណៈ ប៉ះពាល់ដល់ការរស់នៅ ពិសេសប៉ះពាល់ដល់បរិស្ថានយ៉ាងធ្ងន់ធ្ងរ ហើយកត្តាដែលធ្វើឱ្យប្រែប្រួលអាកាសធាតុនោះ អាចមកពីការបំពុលដោយផ្សែង ការកាប់បំផ្លាញព្រៃឈើជាដើម។
សូមបញ្ជាក់ថា ការរៀបចំទិវាអនាម័យបរិស្ថាន ២៣វិច្ឆិកានេះ ក្រោយពីដាក់ជាសំណួរដល់សិស្សឱ្យឆ្លើយពាក់ព័ន្ធនឹងសំណួរផ្សេងៗទាក់ទងនឹងបរិស្ថាន គណៈអធិបតីក៏មានកម្មវិធីផ្តល់ជារង្វាន់ដល់សិស្សានុសិស្សផងដែរ៕ សេង ណារិទ្ធ
