ខេត្តបន្ទាយមានជ័យ ៖ សមាគមចលនាយុវជកម្ពុជា(ក្រុម១៥៧) នៅព្រឹកថ្ងៃទី២៣ ខែសីហា ឆ្នាំ ២០១៩ បាន ចែកគ្រឿងឧបភោគ បរិភោគដល់ ពលរដ្ឋដែលមានជីវភាពខ្វះខាត ចាស់ជរា ជនពិការចំនួន៣០០គ្រួសារ រួមទាំងចែកសម្ភារសិក្សាដល់សិស្សានុសិស្សចំនួន១០០នាក់ នៅក្នុងបរិវេណវត្តពោធិសុវណ្ណសិលារាម នៅក្នុងភូមិអណ្តូងថ្មមាស សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
លោកគង់ រិទ្ធា ប្រធានក្រុមចលនាយុវជនកម្ពុជា(ក្រុម១៥៧) ក្រុងប៉ោយប៉ែត សាខាខេត្តបន្ទាយមានជ័យបានឲ្យដឹងថា ក្រុមចលនាយុវជនកម្ពុជា(ក្រុម១៥៧) ក្រុងប៉ោយប៉ែត សាខាខេត្តបន្ទាយមានជ័យ អាចដំណើរការងារមនុស្សធម៌ចុះជួយដល់ពលរដ្ឋ ខ្វះខាត ចាស់រាជា ជនពិការ កុមារកំព្រា និងសិស្សានុសិស្សដែលមានជីវភាពខ្លះខាតទៅបាន ដោយមានការណែនាំពីលោកម៉ឹង ពន្លក ប្រធានសមាគមចលនាយុវជនកម្ពុជា (ក្រុម១៥៧) និងលោក ចៅ ជីអាន ប្រធានសាខាខេត្តបន្ទាយមានជ័យ ក៏ដូចជាការខិតខំប្រែងទាំងកម្លាំងកាយ កម្លាំងចិត្ត រួមទាំងថវិកា ពីបងប្អូនសមាជិក សមាជិកា និងការចូលរួមសហការណ៍យ៉ាងល្អ របស់អាជ្ញាធរដែនដី កងកម្លាំងប្រដាប់អាវុធគ្រប់លំដាប់ថ្នាក់ សប្បុរសជន និងមានការនិមន្តចូលរួមពីព្រះគ្រូចៅអធិការវត្តជុំវិញក្រុងប៉ោយប៉ែតផងដែរ។
លោក អ៊ុ រាត្រី អភិបាលខេត្តបន្ទាយមានជ័យ បានមានប្រសាសន៍កោតសរសើរដល់សមាគចលនាយុវជកម្ពុជា (ក្រុម១៥៧) ដែលបានយកចិត្តទុកដាក់ គិតគូរដល់ប្រជាពលរដ្ឋដែលកំពុងជួបការលំបាក ខ្វះខាត ចាស់ជរា ជនពិការ និងសិស្សានុសិស្ស ដែលការងារនេះ អាចជួយសម្រាលបន្ទុករបស់អាជ្ញាធរ ក៏ដូចជាជួយសម្រាលបន្ទុករបស់រាជរដ្ឋាភិបាលផងដែរ។ ស្រមពេលដែល សម្តេចអគ្គសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជា កំពុងតែយកចិត្តទុកដាក់ខ្ពស់លើសុខទុក្ខរបស់បងប្អូនប្រជាពលរដ្ឋផងដែរ។
លោក ម៉ឹង ពន្លក ប្រធានសមាគមចលនាយុវជកម្ពុជា(ក្រុម១៥៧) បានថ្លែងថា ក្រុមចលនាយុវជនកម្ពុជា(ក្រុម១៥៧) ត្រូវបានបង្កើតឡើងក្នុងឆ្នាំ ២០០៧ ខណៈដែលកងទ័ពសៀមកំពុងឈ្លានពានយកប្រាសាទព្រះវិហារដែលមានឯកឧត្តម បណ្ឌិតហ៊ុនម៉ាណែតជាស្ថាបនិក ផ្តួចផ្តើមបង្កើតឡើងដើម្បីកៀរគរសប្បុរជនជួយដល់កងកម្លាំងយោធាឈរជើងនៅជួរមុខ តែដោយមានការដឹកនាំដ៏ឈ្លាសវៃរបស់ប្រមុខរាជរដ្ឋាភិបាលដឹកនាំដោយសម្តេចតេជោហ៊ុនសែន នាយករដ្ឋមន្ត្រី នៃព្រះរាជាចក្រកម្ពុជា ធ្វើឲ្យប្រទេសមានសុខសន្តិភាព ទើបសមាគមចលនាយុវជនកម្ពុជា(ក្រុម១៥៧) យកការងារមនុស្សធម៌នេះ មកជួយដល់ប្រជាពលរដ្ឋដែលខ្វះខាតនៅតាមមូលដ្ឋានវិញ។
ឆ្លៀតក្នុងឱកាសចែកគ្រឿងឧបភោគបរិភោគ សម្ភារ និងថវិកា ដល់ប្រជាពលរដ្ឋកំពុងខ្វះខាត និងសិស្សានុសិស្សរបស់ក្រុមចលនាយុវជនកម្ពុជា(ក្រុម១៥៧) នាព្រឹកនេះ តាមរយៈលោក ម៉ឹង ពន្លក សម្តេចអគ្គសេនាបតីតេជោហ៊ុនសែន ក៏បានគិតគូរផ្តល់ជារទេះចំនួន៥គ្រឿង ជូនដល់ជនពិការចំនួន៥នាក់ផងដែរ ៕
