បាត់ដំបង ៖ ពិធីសម្ពោធផ្លូវក្រាលកៅស៊ូចំនួន ៦ខ្សែ ក្នុងស្រុកសង្កែ និង បណ្តាស្រុកផ្សេងទៀត ដែលមន្ទីរសាធារណការ និងដឹកជញ្ជូនខេត្តបានស្ថាបនារួចរាល់ជាស្ថាពរ ដោយក្នុងពិធីនោះត្រូវបានអញ្ជើញចូលរួមពីសំណាក់សម្តេចក្រឡាហោម ស ខេង ជាឧបនាយករដ្ឋមន្ត្រី និង ជារដ្ឋមន្ត្រីក្រសួងមហាផ្ទៃក៏ជាតំណាងដ៏ខ្ពង់ខ្ពស់របស់ប្រមុខនៃ រាជរដ្ឋាភិបាលកម្ពុជា នាថ្ងៃទី ២១ ខែវិច្ឆិកា ឆ្នាំ២០១៥ នេះ។
ក្នុងអង្គពិធីនោះក៏មានមន្ត្រីរាជការ ព្រមទាំងប្រជាពលរដ្ឋយ៉ាងច្រើនកុះករបន្ទាប់ពីលោក ខាន់ ម៉ាណេរ ប្រធានសាធារណការ និង ដឹកជញ្ជូនខេត្តបាត់ដំបងឡើងអានរបាយការណ៍ពាក់ព័ន្ធ និង កិច្ចខិតខំប្រឹងប្រែងរបស់មន្ទីរកន្លងមកដល់គណៈអធិបតី រួចមកសម្តេចក្រឡាហោមស ខេងបានមានមតិសំណេះសំណាលជាមួយបងប្អូនប្រជាពលរដ្ឋ សិស្ស និស្សិត លោកគ្រូអ្នកគ្រូ មន្ត្រីរាជការក្រោមឱវាទ ដែលបានចូលរួមក្នុងថ្ងៃដ៏មានសារៈសំខាន់នេះ សម្តេចក្រឡាហោម ស ខេង បានមានមតិសំណេះ សំណាលជាមួយបងប្អូនប្រជាពលរដ្ឋ សិស្ស និស្សិត លោកគ្រូអ្នកគ្រូមន្ត្រីរាជការក្រោមឱវាទ ដែលបានចូលរួមក្នុងថ្ងៃ ដ៏មានសារៈសំខាន់នេះទាក់ទិនទៅនឹង ការអភិវឌ្ឍន៍គ្រប់ហេដ្ឋារចនាសម្ព័ន្ធ ដែលប្រមុខរាជរដ្ឋាភិបាល តែងគិតថា ការស្តាឡើងវិញនូវប្រព័ន្ធ ហេដ្ឋារចនាសម្ព័ន្ធ គឺជាវិស័យអាទិភាព នៅក្នុងមុំទាំង៤ នៃយុទ្ធសាស្ត្រចតុកោណ ជំហានទី៣របស់រាជរដ្ឋាភិបាលក្នុងអាណត្តិទី ៥។
ចំពោះផ្លូវក្រាលកៅស៊ូ ដែលត្រូវបានសម្ពោធដាក់ឱ្យប្រើប្រាស់ជាផ្លូវការ រួមមាន១ផ្លូវខេត្តលេខ១៥៦BB២ក្រាលកៅស៊ូDBSTប្រវែង១៨,៥០០ម៉ែត្រ ចាប់ពីផ្សារនរា ឃុំនរាទៅដល់ភូមិបឹងទឹម ឃុំតាប៉ុន ស្រុកសង្កែ ២.ផ្លូវខេត្តលេខ១៥៤H១ ក្រាលកៅស៊ូDBSTប្រវែង៤,៩០០ម៉ែត្រពីផ្លូវបំបែកផ្លូវជាតិលេខ៥ ត្រង់ខ្លោងទ្វារវត្តអូរមុនី ឃុំអន្លង់វិល ទៅបំបែកផ្លូវខេត្តលេខ១៥៦BB ២ឃុំនរាស្រុកសង្កែ ៣.ផ្លូវខេត្តលេខ១៥៤HH ២ក្រាលគ្រួសក្រហមប្រវែង១១,៦០០ម៉ែត្រពីបំបែកផ្លូវខេត្តលេខ១៥៤H១ ឃុំនរា ទៅដល់ភូមិដំបូកមានបុណ្យ ឃុំអន្លង់វិល ស្រុកសង្កែ ៤.កំណាត់ផ្លូវជាតិលេខ៥៧(ជួសជុលជាកំណាត់ៗ)ក្រាលកៅស៊ូDBBST ប្រវែង៣.០០០ម៉ែត្រ ៥.ផ្លូវខេត្តលេខ១៥៩C ក្រាលកៅស៊ូBBST ប្រវែង៣៤.៥៧៥ម៉ែត្រ ពីអូរស្ងួតខេត្តបន្ទាយមានជ័យ ដល់ ស្រុកបវេល ៦.ផ្លូវខេត្តលេខ១៥៧០ក្រាលក្រួសក្រហម ប្រវែង១៨.៧៥០ម៉ែត្រពីបំបែកពង្រ ទៅដល់ខ្នងទំនប់កំពីងពួយ ស្រុកបវេល។
នៅក្នុងអង្គពិធីនោះផងដែរ បន្ទាប់ពីសម្តេចក្រឡាហោម បានបញ្ចប់នូវសន្ទរកថា រួចមកក៏មានបំពាក់ គ្រឿងឥស្សរិយយស ដល់មន្ត្រី មួយចំនួន និង ចែកអំណោយដល់សិស្ស និស្សិត លោកគ្រូអ្នកគ្រូ និង អញ្ជើញកាត់ខ្សែបូសម្ពោធផ្លូវដាក់ឱ្យ ប្រើប្រាស់ជាផ្លូវការបញ្ចប់ ក្នុងអង្គពិធី។
សម្តេចក្រឡាហោមបានបន្តថា កាលណាយើងមានប្រព័ន្ធគមនាគមន៍ខ្វាត់ខ្វែងនោះវិស័យផ្សេងៗក៏មានការ រីកចម្រើនយ៉ាងឆាប់រហ័ស និង មានការកាត់បន្ថយគំលាតរវាងទីប្រជុំជន និង ជនបទផងដែរ ដូចជា សេវ៉ាដឹកជញ្ជូនបានឆាប់រហ័សនិងមានតម្លៃទាប ចំណាយពេលខ្លីព្រមទាំងបានបម្រើដល់វិស័យផ្សេងៗដូចជា វិស័យអប់រំវិស័យសុខាភិបាលបូករួមទាំងវិស័យសេដ្ឋកិច្ចសង្គម៘
សម្តេចក្រឡាហោមក៏បានលើកចំណុចចំៗរបស់ទស្សនៈ នៃមនុស្សមួយក្តាប់តូចដែលកំពុងតែធ្វើព្យុះភ្លៀងឥតឈប់ឈររិះគន់ ឬ សន្យាចោលតែសម្រាប់រាជរដ្ឋាភិបាលដែលមានសម្តេចតេជោសែនជា នាយករដ្ឋមន្ត្រីនោះតាំងពីអតីតរហូតដល់បច្ចុប្បន្ន អ្វីដែលគួរអភិវឌ្ឍន៍នោះ គឺធ្វើបន្តលើគ្រប់វិស័យ។
សម្តេចក្រឡាហោមបន្តថា ដោយសារតែយើងដើរតាមមាគ៌ាត្រឹមត្រូវ ហើយយើងក៏អាចសន្យាឱ្យធំជាងគេក៏បានដូចគ្នា សំខាន់លើការអនុវត្ត ជាក់ស្តែងបានតិច ឬ ច្រើនធ្វើយ៉ាងណាឱ្យប្រទេសរីកចម្រើនប្រជាពលរដ្ឋសុខសាន្ត។ ចំពោះមតិរបស់ប្រជាពលរដ្ឋជាច្រើនដែលបានចូលរួមក្នុងពិធីនោះ ពួកគាត់បានគាំទ្រ នូវអនុសាសន៍របស់សម្តេចក្រឡាហោម ដោយពួកគាត់ខ្លះបានបញ្ជាក់ប្រាប់កម្ពុជាថ្មីថា អ្នកខ្លះរវល់តែដើរក្រឡុកគេឯង ដូចអាប៉ោងមិនគិតអំពីការអភិវឌ្ឍន៍ប្រទេសទាល់តែសោះ។/ ដោយ ៖ សារ៉េត
