មណ្ឌលគីរី ៖ សាច់ព្រៃប្រមាណជាង២០០ រួមនឹងម៉ូតូសម្រាប់ប្រព្រឹត្តឹបទល្មើសចំនួន៤គ្រឿង ត្រូវបានជំនាញប្រចាំនៅតំបន់អភិរក្សជីវចម្រុះសីមាដឹកនាំដោយលោក មាគ វុឌ្ឍី ប្រធានគម្រោងកម្មវិធី សហការជាមួយកម្លាំងកងរាជអាវុធហត្ថលើផ្ទៃប្រទេស ដែលមានលោក ស្វាយ សុវណ្ណា ជាមេបញ្ជាការក្តាប់រួម ចាប់បាននៅចំណុចភូមិព្រះ ឃុំស្រែព្រះ ស្រុកកែវសីមា កាលពីព្រឹកថ្ងៃទី២៣ វិច្ឆិកា ។
លោកមាគ វុឌ្ឍី បានឲ្យដឹងថា សត្វព្រៃដែលជំនាញចាប់បាននោះ ជាសត្វទន្សោងនឹងមានទម្ងន់២១០គីឡូក្រាម ។ លោកបន្តថា សាច់សត្វទន្សោងនេះ ត្រូវបានក្រុមព្រានព្រៃលបលួចដាក់អន្ទាក់នៅក្នុងតំបន់ព្រៃការពារ ហើយនៅពេលប្រមាញ់បានហើយនោះ ពួកគេបានពុះបំបែកជាច្រើន បំណែកច្រកក្នុងបាវរួចធ្វើការដឹកជញ្ជូនតាមរយៈម៉ូតូ ។ ជាចៃដន្យនៅពេលក្រុមមន្ត្រីជំនាញ កំពុងធ្វើសកម្មភាពល្បាត ស្រាប់តែប្រទះឃើញក្រុមអ្នកជួញដូរសត្វ កំពុងធ្វើការដឹកជញ្ជូនសាច់ព្រៃចេញពីព្រៃអភិរក្ស ដើម្បីយកទៅលក់លើទីផ្សារ។
លោកស្វាយ សុវណ្ណា មេបញ្ជាការក្តាប់រួមបានឲ្យដឹងថា គ្រាន់តែពួកគេ ឃើញមន្ត្រីជំនាញភ្លាម ក៏ផ្តួលម៉ូតូរត់ចូលព្រៃបាត់ស្រមោលតែម្តង ។ បន្ទាប់ពីប្រមូលបានសាច់ព្រៃហើយ រួមនឹងម៉ូតូដែលជាមធ្យោបាយរួចមក មន្ត្រីជំនាញបានដឹកយកមក រក្សាទុកនៅស្នាក់ការអភិរក្ស រង់ចាំធ្វើការដុតកម្ទេចចោលនូវសាច់ព្រៃខាងលើ ចំនែកម៉ូតូកម្លាំងជំនាញកំពុងធ្វើការស្រាវជ្រាវរកម្ចាស់ ដើម្បីចាត់ការតាមផ្លូវច្បាប់ ៕
ដោយ ៖ ចិន្ដា កម្ពុជាអភិវឌ្ឍន៍
