ខេត្តប៉ៃលិន ៖ មានប្រសាសន៍នៅក្នុង ទិវាលើកកំពស់អនាម័យជនបទ ១៣ វិច្ឆិកា លើកទី១៦ ឆ្នាំ២០១៥ ក្រោមប្រធានបទ (អនាម័យល្អ គឺជាការទទួលខុសត្រូវ របស់យើងទាំងអស់គ្នា) ដែលរៀបចំដោយមន្ទីរអភិវឌ្ឍន៍ជនបទខេត្តប៉ៃលិនឯកឧត្តម ម៉ី មគ្គ អភិបាលរងខេត្តប៉ៃលិនបានប្តេជ្ញាថា អាជ្ញាធរខេត្ត និង អង្គភាពពាក់ព័ន្ធ រួមទាំងប្រជាពលរដ្ឋ នឹងខិតខំធ្វើយ៉ាងណានៅមុនឆ្នាំ២០២៥ ប្រជាពលរដ្ឋខេត្តប៉ៃលិន មានបង្គន់អនាម័យ និងទឹកស្អាតប្រើប្រាស់ គ្រប់ៗគ្នា។
លោកបានលើកឡើងថា៖ រាជរដ្ឋាភិបាលកម្ពុជាតែងតែបានទទួលស្គាល់អំពីភាពចាំបាច់នៃការលើកកំពស់អនាម័យជនបទ ដោយក្នុងគោលនយោ បាយជាតិ ស្តីពីការផ្គត់ផ្គត់ទឹកស្អាត និងអនាម័យបានកំណត់នូវចក្ខុវិស័យច្បាស់លាស់ថា ក្នុងឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ ត្រូវមានការផ្គត់ផ្គង់ទឹកស្អាត និងអនាម័យគ្រប់គ្រាន់ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្តរភាព។
ដូច្នេះការរៀបចំប្រារព្វទិវាលើកកំពស់អនាម័យជនបទ ១៣ វិច្ឆិកានេះគឺក្នុងគោលបំណងបន្តជំរុញ និងយកចិត្តទុកដាក់ កាន់តែខ្ពស់ថែមទៀតក្នុងការ បំផុសការយល់ដឹង ការផ្សព្វផ្សាយជូនដល់បងប្អូនប្រជាជន ក្នុងការរួមគ្នាលើកកំពស់អនាម័យ ជនបទ ដែលជាមួលដ្ឋានសំខាន់មួយនៃការលើកតម្កើង សុខមាលភាពសង្គម និងសេដ្ឋកិច្ចជាតិរបស់យើង។
លោកស្រី សោ មុន្នីរ័ត្ន ប្រធានមន្ទីរអភិវឌ្ឍន៍ជនបទខេត្តប៉ៃលិនបានបញ្ជាក់ថា៖ ប្រជាពលរដ្ឋភាគច្រើនងាកមកប្រតិប័ត្តលើការរស់នៅស្អាត ហូប ស្អាត ផឹកស្អាត ដោយអនុវត្តនូវអនាម័យ៣ប្រការគឺ ទី១សាងសង់និងប្រើប្រាស់បង្គន់អនាម័យ ទី២ លាងសំអាតដៃជាមួយសាប៊ូនៅពេលចាំបាច់ ទី៣ បរិភោគទឹកស្អាត និងទុកអោយមានសុវត្ថភាព។
លោកស្រីបានបន្តថា អត្រាគ្របដណ្តប់អនាម័យនៅក្នុងខេត្តប៉ៃលិនមានការកើនឡើងគួរគាត់ សំគាល់ ដោយក្នុងនោះ ផ្នែកទឹកស្អាតបានចំនួន៤៩% អនាម័យបាន៤៥% និងមានភូមិចំនួន៦ ក្នុងឃុំអូរអណ្តូង ស្រុកសាលាក្រៅ ប្រជាពលរដ្ឋបាន ឈប់បន្ទោបង់ពាសវាលពាសកាល ងាកមកប្រើប្រាស់បង្គន់អនាម័យបាន១០០%តែម្តង ៕
ស សារ៉េត ហៅ សារឿន
