មណ្ឌលគិរី ៖ កាលពីព្រឹកថ្ងៃទី២៣ វិច្ឆិកា នេះ លោកអនុសេនីយ៏ឯក ទៀ ខៃម៉េង មេបញ្ជាការកងអនុសេនាធំលេខ២ ប្រចាំស្រុកកែវសីមាបានមានប្រសាសន៏ថា ដោយមើលឃើញពីទុក្ខលំបាករបស់ប្រជាពលរដ្ឋក្នុងរដូវប្រមូលផលស្រូវ លោកក៏បានសុំគោលការណ៏ពីឧត្តមសេនីយ៏ត្រី ឃិន ម៉េងស្រេង មេបញ្ជាការតំបន់ប្រតិបត្តិការសឹករងមណ្ឌលគិរី នាំកម្លាំងសហការជាមួយស្ថាប័ននគរបាលនឹងយោធារប្រទេសវៀតណាម ចុះជួយច្រូតស្រូវដល់ពួកគាត់ឲ្យទាន់ពេលវេលា។
លោកមេបញ្ជាការបានបញ្ជាក់ថា មន្ត្រីកងកម្លាំងទាំងអស់មិនត្រឹមតែមានតួនាទីការពារជាតិមាតុភូមិនោះទេ កងកម្លាំងនូវមានកាតកិច្ចជួយការងារសង្គម នឹងដោះស្រាយទុក្ខលំបាកដល់ប្រជាពលរដ្ឋផងដែរ ។
លោកបានបន្តថា ក្រុមការងារបានជួយច្រូតស្រូវដល់ប្រជាពលរដ្ឋនៅព្រឹកថ្ងៃទី២៣ បានចំនួនប្រាំហិចតា នឹងបន្តជួយច្រូតដល់ប្រជាពលរដ្ឋដែលខ្វះខាតកម្លាំងជាបន្តទៀត។
លោកអនុសេនីយ៍ត្រី ប៊ូ សំអុល នាយផ្នែកប៉ុស្តិ៍ការពារព្រំដែនឡាប៉ាខេបានឲ្យដឹងថា ដើម្បីចូលរួមផ្សារភ្ជាប់ជាមួយប្រជាពលរដ្ឋចុះជួយគ្រប់គ្រាលំបាកដែលប្រជាពលរដ្ឋជួយប្រទះនូវទុក្ខលំបាក ខ្វះខាតនូវធនធាន ជាពិសេសស្ត្រីមេម៉ាយ ចាស់ជរា និងគ្រួសារទីទាល់ក្រ កម្លាំងចម្រុះដែលមានចំនួនជាង២០នាក់ចុះជួយច្រូតស្រូវជូនដល់កសិករយ៉ាងសស្រាក់សស្រាំ។
ម្ចាស់ស្រែបានថ្លែងអំណរគុណយ៉ាក្រៃលែង ដោយបានឃើញកងកម្លាំងបានចូលរួម ចុះជួយច្រូតកាត់ស្រូវបានស្រុះគ្នា និងទាន់ពេលវេលាក្នុងរដូវប្រមូលផល និងអគុណ មេបញ្ជាការកងអនុសេនាធំលេខ២ នាយប៉ុស្តិ៍ការពារព្រំដែនឡាប៉ាខេ នឹងយោធារុករកអដ្ឋិធាតុ របស់កងទ័ពស្ម័គ្រចិត្តវៀតណាម K51 ដែលតែងតែយកចិត្តទុកដាក់ដល់ជីវភាពរបស់ប្រជាពលរដ្ឋ និងក្រុមគ្រួសារកងទ័ពកន្លងមក ៕
ដោយ ៖ ចិន្ដា កម្ពុជាអភិវឌ្ឍន៍
