ខេត្តមណ្ឌលគិរី ៖ ប្រជាពលរដ្ឋក្រីក្រ រងគ្រោះ និងងាយរងគ្រោះចំនួន ៣០៥គ្រួសារ មកពីឃុំស្រែអំពូម និងឃុំក្រងតេះ ក្នុងស្រុកពេជ្រជា ខេត្តមណ្ឌលគិរី បានទទួលអំណោយ និងថវិកាមួយចំនួន របស់រាជរដ្ឋាភិបាលកម្ពុជា តាមរយះឯកឧត្តម វង សូត រដ្ឋមន្ត្រី ក្រសួងសង្គមកិច្ចអតីតយុទ្ធជន និងយុវនិតិសម្បទា នៅព្រឹកថ្ងៃទី ១៨ខែវិច្ឆិកានេះ ។
ក្នុងឱកាសនោះដែរ ឯកឧត្តមរដ្ឋមន្ត្រី បានមានប្រសាសន៍ ក្រសួងសង្គមកិច្ចអតីតយុទ្ធជន និងនីតិសម្បទា គឺជាស្ថាប័នមួយរបស់រាជរដ្ឋាភិបាល លើការងារមួយផ្នែក សម្រាប់បំពេញនូវតួនាទីរបស់ខ្លួន បម្រើផលប្រយោជន៍ជូនដល់ប្រជាពលរដ្ឋដែលរងនូវការខ្វះខាត ជាក់ស្តែងនាថ្ងៃនេះក្រោយពីទទួលបានព័ត៌មានពីអាជ្ញាធរខេត្ត និងលោកប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តមណ្ឌលគិរី ពីស្ថានភាពគ្រោះមហន្តរាយដោយសារគ្រោះធម្មជាតិជាយថាហេតុផ្សេងៗ ។
ឯកឧត្តមរដ្ឋមន្ត្រីបាននាំយកអំណោយ និងថវិកា របស់រាជរដ្ឋាភិបាលកម្ពុជាមកប្រគល់ជូនដល់ក្រុមជនរងគ្រោះ និងងាយរងគ្រោះ ក៏ដូចជាជនក្រីក្រនៅតាមសហគមន៍ ជនចាស់ជរាគ្មានទីពឹង ជនអានាថា ជនពិការ កុមារកំព្រានៃគ្រួសារក្រីក្រ និងកុមារកំព្រារងគ្រោះ ។
ឯកឧត្តមបានបន្តទៀតថា ទោះបីអំណោយទាំងនេះ ទោះបីមិនបានច្រើនតាមសេចក្តីត្រូវការក៏ពិតមែន តែវាបានចូលរួមចំណែក ជួយសម្រួលដល់ការដោះស្រាយបានមួយរយះពេលផងដែរ ។ ប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តមណ្ឌលគិរី លោក ខឹម ចាន់ផល បានឲ្យដឹងថាអំណោយដែលចែកជូននាពេលនោះរួមមាន៖ ភូយចំនួន០១ កន្ទេលចំនួន០១ ទឹកត្រីចំនួន០៦ដប អង្ករចំនួន២៥គីឡូក្រាម និងថវិកាចំនួន២ម៉ឺនរៀលផងដែរ ៕
