មណ្ឌលគិរី ៖ ម៉ូតូអត់ពន្ធជាច្រើនគ្រឿង ត្រូវបានឈ្មួញដាក់តាំងលក់ម៉ាសេរី អមតាមសងខាងផ្លូវជាតិលេខ៧៦ ស្ថិតក្នុងភូមិអូរស្ពាន សង្កាត់ស្ពានមានជ័យ ចំកណ្តាលក្រុងសែនមនោរម្យ ។
បើតាមប្រជាពលរដ្ឋនិយាយថា ម៉ូតូដែលគ្មានលិខិតស្នាមនាំចូលទាំងនេះ គេឃើញដាក់លក់តាមហាងលក់ម៉ូតូជាច្រើនកន្លែង ក្នុងក្រុងសែនមនោរម្យ ។ ហាងលក់ម៉ូតូទាំងនេះមានដាក់លក់ម៉ូតូអត់ពន្ធជាយូរមកហើយ ប៉ុន្តែកម្រឃើញមានវត្តមានសមត្ថកិច្ចជំនាញចុះធ្វើការត្រួតពិនិត្យណាស់ ហាក់ដូចជាត្រជាក់ចិត្តទាំងអស់គ្នា ។
ប្រភពពីប្រជាពលរដ្ឋដែលរស់នៅក្បែរហាងលក់ម៉ូតូទាំងអស់នោះ និយាយថា កាលពីអំឡុងដើមឆ្នាំ២០១៣ គេធ្លាប់ឃើញនគរបាលសេដ្ឋកិច្ចចុះបង្ក្រាបទីតាំងលក់ម៉ូតូអត់ពន្ធទាំងនេះម្ដងដែរ ប៉ុន្តែបន្ទាប់ពីការបង្ក្រាបនោះរហូតមកដល់បច្ចុប្បន្ន គេឃើញហាងលក់ម៉ូតូទាំងនោះដាក់តាំងលក់ម៉ូតូអត់ពន្ធច្រើនជាងមុនទៅទៀត ហើយមិនមានការបង្ក្រាបទៀតឡើយ។
សេចក្ដីរាយការណ៍បាននិយាយទៀតថា មូលហេតុដែលមិនមានមន្ត្រីជំនាញចុះបង្ក្រាប់ទីតាំងលក់ម៉ូតូអត់ពន្ធទាំងនោះ ត្រូវគេសង្ស័យថា មន្ត្រីជំនាញ ដែលមានតួនាទីបង្ក្រាបបទល្មើទទាំងនេះអាចមានជាប់ពាក់ព័ន្ធនឹងរឿងអ្វីមួយ ជាមួយនឹងឈ្មួញលក់ម៉ូតូអត់ពន្ធទាំងអស់នោះហើយទើបមិនបង្ក្រាប ។
បើយោងតាមប្រភពព័ត៌មានពីម្ចាស់ហាងលក់ម៉ូតូមួយរូប ក្នុងក្រុងសែនមនោរម្យបានប្រាប់អ្នកសារព័ត៌មានដោយត្រង់ថា ម៉ូតូដែលដាក់លក់សព្វថ្ងៃនេះគឺលាយឡំគ្នា ទាំងម៉ូតូអត់ពន្ធ និងមានពន្ធ ។ ចំពោះម៉ូតូអត់ពន្ធ គាត់ទិញយកមកលក់បន្តពីឈ្មួញ ដែលម៉ូតូអត់ពន្ធទាំងនេះគឺពួកឈ្មួញនាំចូលតាមច្រកទ្វេភាគី និងច្រករបៀងមួយចំនួនតាមបន្ទាត់ព្រំដែនក្នុងខេត្តមណ្ឌលគិរី និងស្រុកស្នួល ខេត្តក្រចេះ ។
ជុំវិញករណីនេះ លោក សំ សុវណ្ណរិទ្ធ ប្រធានសាខាគយនិងរដ្ឋាករខេត្ត ថ្លែងថា លោកទទួលស្គាល់ថាពិតជាមានម៉ូតូអត់ពន្ធដាក់លក់នៅក្នុងក្រុងសែនមនោរម្យមែន តែលោកមិនទាន់អាចចុះបង្ក្រាបបានទេ ។ តាមការណែនាំរបស់ថ្នាក់លើ តម្រូវឲ្យម្ចាស់ហាងដែលលក់ម៉ូតូអត់ពន្ធទាំងនោះ ស្ម័គ្រចិត្តយកម៉ូតូដែលអត់ពន្ធចូលមកបង់ពន្ធដោយខ្លួនឯងសិន តែបើម្ចាស់ម៉ូតូអត់ពន្ធទាំងនោះនៅតែមិនធ្វើតាមការណែនាំ ទើបឈានដល់ការបង្ក្រាប ។
លោកប្រធានសាខាគយនិងរដ្ឋាករខេត្តបានឲ្យដឹងទៀតថា ចំពោះការនាំម៉ូតូអត់ពន្ធចូលតាមច្រករបៀងនានាក្នុងខេត្តមណ្ឌលគិរីនោះ លោកមិនបានដឹងច្បាស់ទេ ព្រោះច្រករបៀងគឺនៅក្រៅដែនសមត្ថកិច្ចរបស់លោក ប៉ុន្តែនៅតាមច្រកទ្វារទ្វេភាគី ដែលមានមន្ត្រីសាខាគយប្រចាំការ មិនមានការនាំម៉ូតូគេចពន្ធចូលទេ ។
យ៉ាងណាក៏ដោយ មជ្ឈដ្ឋាននានាក្នុងខេត្តមណ្ឌលគិរី បានលើកឡើងថា សមត្ថកិច្ចជំនាញពាក់ព័ន្ធមិនគួរបណ្តែតបណ្ដោយឲ្យឈ្មួញលក់ម៉ូតូអត់ពន្ធយ៉ាងអនាធិបតេយ្យយូរឆ្នាំមកហើយបែបនេះទេ គួរណារួមគ្នាទប់ស្កាត់ឲ្យមានប្រសិទ្ធភាពជុំវិញបញ្ហានេះ ។ ការបើកឲ្យលក់ដូរម៉ូតូអត់ពន្ធយ៉ាងសេរីដូច្នេះ ធ្វើឲ្យខាតបង់ចំណូលពន្ធនាំចូលរបស់រដ្ឋយ៉ាងច្រើនក្នុងមួយឆ្នាំៗ ហើយម្យ៉ាងវិញទៀត ការបើកដៃឲ្យហាងលក់ម៉ូតូនានាដាក់លក់ម៉ូតូគ្មានលិខិតស្នាមត្រឹមត្រូវដូច្នេះ ក៏អាចជាទីផ្សារងងឹតសម្រាប់ទិញលក់ម៉ូតូចោរផងដែរ ៕
