នៅព្រឹកថ្ងៃទៅ២៧ ខែមិថុនា ឆ្នាំ២០២៣ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន ទទួលជួបពិភាក្សាការងារជាមួយ លោក ជេត សន គណៈកម្មាធិការនាយកក្លិបអ្នកកាសែតកម្ពុជា រួមជាមួយ
លោក អ៊ុង ថាប់រ៉ាន ចាងហ្វាងគេហទំព័រខ្មែរជាយដែន កម្ពុជា ថៃ ។

ក្នុងឱកាសនេះដែរ លោក អ៊ុង ថាប់រ៉ាន បានគោរពស្នើសុំមតិណែនាំសំខាន់ៗមួយចំនួនពី ឯកឧត្តម រដ្ឋមន្រ្តី ក្រសួងព័ត៌មាន ដើម្បីអោយការអនុវត្តបំពេញតូនាទី ភារកិច្ចជាស្ថាប័នសារព័ត៌មានអនឡាញ កាន់តែមានប្រសិទ្ធិភាព និងទទួលបានការគាំទ្រចូលមើលច្រើន នៅពេលផ្សាយព័ត៌មាន ។

ឯកឧត្តម ខៀវ កាញារីទ្ធ បានបញ្ជាក់ថា អ្វីដែលសំខាន់សម្រាប់អ្នកសារព័ត៌មានត្រូវអនុវត្តន៍ គឺគោរពក្រមសិលធម៌វិជ្ជាជីវៈអោយបានត្រឹមត្រូវ ផ្សាយតែព័ត៌មានណាដែលពិត មិនធ្វើការប្រឌិតព័ត៌មាននោះទេ ហើយត្រូវចាំថាការផ្សាយព័ត៌មានមិនពិត កុហក់ នឹងធ្វើអោយបាត់ទំនុកចិត្តអ្នកអាន និងទស្សនា ។

ឯកឧត្តម រដ្ឋមន្រ្តី បានលើកឡើងថា បច្ចុប្បន្ននេះព័ត៌មានក្លែងក្លាយ និងបំពុលសង្គម មានច្រើន ពិសេសក្នុងពេលនៃការត្រៀមបើកយុទ្ធនាការឃោសនាបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣ នឹងមានព័ត៌មានមិនពិតជាច្រើនបានផ្សព្វផ្សាយ ធ្វើអោយការប៉ះពាល់ដល់ដំណើរការឃោសនា និងការបោះឆ្នោត ។

ដូច្នេះក្នុងនាមស្ថាប័នសារព័ត៌មាន ដែលគោរពវិជ្ជាជីវៈត្រឹមត្រូវ ធ្វើយ៉ាងណារួមគ្នាប្រយុទ្ធប្រឆាំងព័ត៌មានក្លែងក្លាយ ដំណឹងប្រឌិតផ្សេងៗ ដើម្បីស្ថេរភាពសង្គម និងសុខសន្តិភាពនៅកម្ពុជាកាន់តែរឹងមាំបន្តទៅមុខ ទៀត ៕