ខេត្តបន្ទាយមានជ័យ៖ នារសៀល ថ្ងៃសុក្រ ទី២៦ ខែឧសភា ឆ្នាំ២០២៣នេះ ជនសង្ស័យជាអ្នកលក់ភេសជ្ជៈតាមម៉ូតូកងបីតែបន្លំលក់គ្រឿងញៀនត្រូវបានកម្លាំងអាវុធហត្ថខេត្តបន្ទាយមានជ័យ ឃាត់ខ្លួនបញ្ជូន ទៅតុលាការ។
កាលពីនៅវេលាម៉ោង០៩និង០០នាទី ថ្ងៃទី២៥ ខែឧសភា ២០២៣បានដឹកនាំកម្លាំងមូលដ្ឋានអាវុធហត្ថក្រុង បេីកប្រតិបត្តិការបង្រ្កាបករណី ជួញដូរដោយខុសច្បាប់នូវសារធាតុញៀន ដោយបានឃាត់ខ្លួនជនសង្ស័យឈ្មោះ ខៀវ សីហា ភេទប្រុស អាយុ៤០ឆ្នាំ ជនជាតិខ្មែរ មុខរបរលក់ដូរ បច្ចុប្បន្ន រស់នៅភូមិ៤ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យនៅចំណុចតារាងបាល់ទាត់ ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខណៈដែលជនសង្ស័យបើកម៉ូតូកង់បីលក់ទឹកភេសជ្ជៈតាមផ្លូវបានបន្លំលក់គ្រឿងញៀន ។
វត្ថុតាងដកហូតរួមមាន -ម៉្សៅក្រាមពណ៌សថ្លា (ទឹកកក) ចំនួន០៥កូនថង់កិប ទម្ងន់ ១១,៥១ក្រាម -ម៉ូតូកង់បី (កែច្នៃ) ចំនួន ០១គ្រឿង (ម៉ាកហុងដាឌ្រីម ពណ៌ខ្មៅ ពាក់ផ្លាកលេខ កណ្តាល1W-5620 -ទូរស័ព្ទដៃចំនួន០១គ្រឿង (ម៉ាកVIVO ពណ៌ខៀវ) កូនថង់សម្រាប់ច្រកគ្រឿងញៀនមួយចំនួន។
បន្ទាប់ពីឃាត់ខ្លួន និងសួរចម្លេីយ ជនសង្ស័យ បានឆ្លេីយសារភាពថា រូបខ្លួនពិតជាបានលក់ដូរដោយខុសច្បាប់នូវសារធាតុញៀនពិតប្រាកដមែន ។
បច្ចុប្បន្នជនសង្ស័យនិងវត្ថុតាងខាងលើត្រូវសមត្ថកិច្ចកសាងសំណំរឿងចាត់ការបន្តតាមនីតិវិធី ៕
