(ខេត្តកែប)៖ មនុស្សម្នាក់បានរងរបួសយ៉ាងដំណំ និងម្នាក់ទៀតរងរបួសស្រាល ដោយសារឧបទ្ទវហេតុគ្រោះថ្នាក់ចរាចរ រវាងរថយន្តនិងម៉ូតូក្នុងទិសខ្វែងគ្នា លើកំណាត់ផ្លូវលេខ៣៣អា។
គ្រោះថ្នាក់នេះបានកើតឡើងកាលពីវេលាម៉ោង១១និង៣០នាទីថ្ងៃទី១៨ ខែសីហា ឆ្នាំ២០១៩ ត្រង់ចំណុចចន្លោះគីឡូម៉ែត្រលេខ២និងលេខ៣ ទល់មុខក្លោងទ្វារ សាលាបឋមសិក្សាអង្គភ្នំតូច ស្ថិតនៅភូមិកំពង់ត្រឡាច សង្កាត់ព្រៃធំ ក្រុងកែប ខេត្តកែប។
យោងតាមប្រភពព័ត៌មានពីមន្ត្រីប៉ូលិសមូលដ្ឋានបានបញ្ជាក់ថា គ្រោះថ្នាក់នេះបង្កឡើងរវាងរថយន្តនិងម៉ូតូ(មានទិសដៅកែងគ្នា)រវាងរថយន្តម៉ាក វីហ្គូពណ៌ទឹកប្រាក់ ស្លាកលេខ ភ្នំពេញ 2I-8082 អ្នកបើកបរ ឈ្មោះ គង់ សុជាតិ ភេទ ប្រុស អាយ៥៤ឆ្នាំ មុខរបរ អ្នកបើកបរ(របួសស្រាល)មានទីលំនៅ ភូមិផ្សារថ្មីពីរ សង្កាត់ផ្សារថ្មីទីពីរ ខណ្ឌដូនពេញ រាជធានីភ្នំពេញ។
ប្រភពបានបន្តថាមុនពេលជួបគ្រោះថ្នាក់រថយន្តបានបោះពួយនៅលើទ្រូងផ្លូវ ស្រាប់តែមកដល់ចំណុចកើតហេតុក៏មានម៉ូតូមួយគ្រឿងម៉ាកC125 ពណ៌ខ្មៅ ពាក់ស្លាកលេខ ក្រ-កែប 1A-0120 បើកចេញមកពីផ្លូវលំ ក៏វាក់អើុគ្នា រួបព្រលះគ្នាប្រាវតែម្តង។ប៉ូលិសបន្តថា អ្នកបើកបរម៉ូតូ ឈ្មោះ មាស តឹម ភេទប្រុស អាយុ៦៧ឆ្នាំ មុខរបរ កសិករ (រងរបួសធ្ងន់)មានទីលំនៅ ភូមិកំពង់ត្រឡាច សង្កាត់ព្រៃធំ ក្រុងកែប ខេត្តកែប។ មូលហេតុដែលបង្កបញ្ហា គឺម៉ូតូបើកបរខ្វះការប្រុងប្រយ័ត្នទើបបង្កជាគ្រោះថ្នាក់ធ្ងន់ធ្ងរបែបនេះ។
បច្ចុប្បន្នជនរងគ្រោះត្រូវបាននាំទៅសង្គ្រោះទៅមន្ទីរពេទ្យ។ដោយឡែក វត្ថុតាងទាំងពីរយកមករក្សាទុកនៅអធិការនគរបាលក្រុងកែប៕ សេង ណារិទ្ធ
