(ខេត្តកំពត)៖ យ៉ាងហោចណាស់ក៏មានមនុស្ស២នាក់ស្លាប់ និងម្នាក់ទៀតរងរបួសធ្ងន់ ដោយសារករណីគ្រោះថ្នាក់ចរាចរណ៍ ជិះម៉ូតូបុកបង្កាន់ដៃស្ពាន លើកំណាត់ផ្លូវលេខ៤១។
តាមសេចក្តីរាយការណ៍ពីសមត្ថកិច្ចនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តបានឲ្យដឹងថា គ្រោះថ្នាក់ចរាចរដ៏រន្ធត់នេះ បានកើតឡើងកាលពីវេលាម៉ោង ១១និង១៥នាទីថ្ងៃត្រង់ ថ្ងៃ១៣រោជ ខែភទ្របទ ឆ្នាំច សំរឹទ្ធិស័ក ពស២៥៦២ ត្រូវនឹងថ្ងៃទី០៧ ខែតុលា ឆ្នាំ ២០១៨ ដែលបង្កឡើងដោយយុវវ័យ ៣នាក់ជិះម៉ូតូម៉ាកសេ១២៥ ពណ៌ខ្មៅ សេរី២០១៥ ពាក់ផ្លាកលេខ កំពត 1L-1849 ឌុបគ្នាក្នុងល្បឿនលឿន រួចជ្រុលចង្កូត ទៅបុកបង្កាន់ដៃស្ពាន ភ្លោះ លើផ្លូវជាតិលេខ៤១ (អង្គឌួង)ចន្លោះគីឡូម៉ែត្រ លេខ៥៥/៥៦ ត្រង់ចំណុចស្ពានភ្លោះ ស្ថិតក្នុងភូមិខ្ពបរុន ឃុំស្រែចែង ស្រុកជុំគីរី ខេត្តកំពត។
ប្រភពពីសមត្ថកិច្ចដដែលបានឲ្យដឹងទៀតថា ក្នុងករណីបង្កគ្រោះថ្នាក់ដោយខ្លួនឯងខាងលើ បណ្តាលឲ្យយុវវ័យក្មេង២ នាក់ស្លាប់នៅកន្លែងកើតហេតុភ្លាមៗ និងម្នាក់រងរបួសធ្ងន់ ត្រូវបានក្រុមគ្រួសារដឹកទៅសង្គ្រោះនៅមន្ទីរពេទ្យបង្អែកខេត្តភ្លាមៗ ចំណែកសាកសពត្រូវបានសមត្ថកិច្ចទំនាក់ទំនងក្រុមគ្រួសារឲ្យមកដឹកទៅតាមគេហដ្ឋានដើម្បីរៀបចំធ្វើបុណ្យតាមប្រពៃណី ។
ប្រភពបានបន្តថា ជនរងគ្រោះទាំងនាក់បីជិះម៉ូតូមួយគ្រឿងឌុបគ្នាហើយបង្កគ្រោះថ្នាក់ដោយខ្លួនឯងខាងលើ គឺម៉ូតូបើកក្នុងទិសដៅពីជើងទៅត្បូង អ្នកបើកបរមានឈ្មោះ ភាព ភេទប្រុស អាយុ១៧ឆ្នាំ មានទីលំនៅភូមិពងទឹក ឃុំស្រែចែង ស្រុកជុំគីរី ខេត្តកំពត រងរបួសធ្ងន់ត្រូវបានសាច់ញាតិដឹកទៅសង្គ្រោះនៅមន្ទីរពេទ្យបង្អែកខេត្តភ្លាមៗ ចំណែកអ្នករួមដំណើរ២នាក់ ទី១ឈ្មោះ ហូ ថុល ភេទប្រុស អាយុ ១៧ ឆ្នាំ រស់នៅភូមិឃុំ ជាមួយគ្នាបានស្លាប់។
ទី២/ ឈ្មោះ ថន ង៉ែត ភេទប្រុស អាយុ ១៣ ឆ្នាំ រស់នៅភូមិឃុំជាមួយគ្នាបានស្លាប់នៅនិងកន្លែងកើតហេតុ ហើយត្រូវបានសាច់ញាតិក្រុមគ្រួសារដឹកយកទៅធ្វើបុណ្យតាមប្រពៃណី។ចំណែកម៉ូតូរវស់ជនរងគ្រោះ ត្រូវបានសមត្ថកិច្ចប្រគល់ជូនដល់ក្រុមគ្រួសារ៕
សេង ណារិទ្ធ
